تەرمی ئاکام عومەر گەڕێندرایەوە هەرێمی کوردستان
رووداو دیجیتاڵ
بەیانیی ئەمڕۆ شەممە تەرمی ئاکام عومەر، فەرماندەی هێزەکانی کۆماندۆ لە رێگەی فڕۆکەخانەی نێودەوڵەتیی سلێمانییەوە گەڕێندرایەوە هەرێمی کوردستان و بە رێوڕەسمێکی سەربازی پێشوازی لێکرا.
رۆژی شەممە، 17-12-2022، تەرمی ئاکام عومەر، فەرماندەی فەرماندەیی هێزەکانی کۆماندۆی کوردستان لە شاری هانۆڤەری ئەڵمانیاوە گەیشتە فڕۆکەخانەی سلێمانی و بڕیارە لە رێوڕەسمێکی گەورەدا لە گۆڕستانی شێخ ئەحمەدی شاری هەولێر بە خاک بسپێردرێت.
هۆرڤان رەفعەت، پەیامنێری تۆڕی میدیایی رووداو لە سلێمانی گوتی، بە ئامادەبوونی کۆمەڵێک بەرپرسی حیزبی و حکومی لە فڕۆکەخانەی سلێمانی رێوڕەسمێک بۆ پێشوازیکردن لە تەرمی ئاکام عومەر رێکخراوە و هاوکات لە بارەگای یەکەی 70ی هێزی پێشمەرگەی کوردستانیش رێوڕەسمێک بۆ رێزگرتن لەو فەرماندەیە بەڕێوەدەچێت.
ئاکام عومەر لەدایکبووی هەولێرە و بڕیارە دوای بەڕێوەچوونی رێوڕەسمەکە، هەر ئەمڕۆ تەرمەکەی رەوانەی هەولێر بکرێت و لە گۆڕستانی شێخ ئەحمەد لە رێورەسمێکی گەورەدا بەخاک بسپێردرێت.
🔴رێوڕەسمی گەڕاندنەوەی تەرمی ئاکام عومەر، فەرماندەی هێزی کۆماندۆی کوردستان بۆ هەرێمی کوردستان لە فڕۆکەخانەی سلێمانیhttps://t.co/xDdJUnqByX pic.twitter.com/Kb1mokJelW
— Rudaw (@Rudawkurdish) December 17, 2022
ئاکام عومەر، فەرماندەی فەرماندەیی هێزەکانی کۆماندۆی کوردستان رۆژی 19-10-2022 فەرماندەیی هێزێکی کۆماندۆی دەکرد بۆ کێوماڵکردنی ناوچەی زینانە لە گەرمیان و لەکاتی گەڕانەوەیاندا تۆڕێکی مین پێیاندا تەقییەوە و بەهۆیەوە ئاکام عومەر و حەوت پێشمەرگەی دیکە برینداربوون، دوای مانەوەی 10 رۆژ لە نەخۆشخانەی فارووق، بەهۆی قورسی برینەکەی رۆژی 19-10-2022 بۆ چارەسەر رەوانەی ئەڵمانیا کرا و رۆژی 12-12-2022 لە نەخۆشخانەیەکی شاری هانۆڤەری ئەڵمانیا گیانی لەدەستدا.