وەزیری پەروەردە: بایی 100 ملیۆن دینار پێداویستیمان بۆ قوتابخانەکانی چەمچەماڵ دابین کردووە

 

رۆژی چوارشەممە، 17ی 12ی 2025، ئالان حەمەسەعید، وەزیری پەروەردەی هەرێمی کوردستان بەبۆنەی رۆژی ئاڵای کوردستان لە قوتابخانەی قەندیل لە تەکیە گوتارێکی پێشکێش کرد و گوتی: "وەزارەتەکەمان رەزامەندی بودجەی بۆ هەموو پارێزگاکان ناردووە؛ بۆ ئەوەی قوتابخانە دروست بکرێ و نۆژەن بکرێنەوە. لە ساڵی 2022 بە بەهای 5 ملیار دینار رەزامەندی دراوە قوتابخانەی نوێ دروست بکرێت و نۆژەن بکرێتەوە؛ ئەو قوتابخانەیەی تەواو نەکراوە، تەواو بکرێت."

 

بە گوتەی وەزیری پەروەردە، هیواداربوون دروستکردن و نۆژەنکردنەوەکان هەموویان جێبەجێ بکرێن و بگونجێنرێن لەگەڵ دۆخی دارایی هەرێمی کوردستان. بە گوێرەی ئەو بودجەیەی بۆ وەزارەتی پەروەردە دیاریکراوە؛ بەکاش پارەیان خستووەتە سەر هەژماری پەروەردەی سلێمانی.

 

7ی 12ی 2025، شەپۆلێکی بارانبارین باشووری کوردستانی گرتەوە و بۆ سێ رۆژ بەردەوام بوو. بەهۆیەوە لە بەشێکی باشووری کوردستان، لە نێویاندا لە قەزای چەمچەماڵ و دەوروبەری، لافاو دروست بوو؛ گیانلەدەستدان و برینداری لێکەوتەوە.

 

وەزیری پەروەردە روونیکردەوە، "بە پشتیوانی سەرۆکوەزیران، بایی 100 ملیۆن دینار پێداویستیی قوتابخانەمان بۆ قەزای چەمچەماڵ کڕیوە و بۆمان هێناون؛ بە هاوکاری پەروەردەی هەولێر و سلێمانی 85 هەزار پەرتووکی نوێی خوێندمان بۆ چەمچەماڵ دابین کردووە؛ کە بەهاکەی بایی 101 ملیۆن دینارە. کۆی پشتیوانییەکان 330 ملیۆن دینارە."

 

ئالان حەمەسەعید سوپاس و پێزانینی بە مامۆستایانی قەزای چەمچەماڵ بەخشی و ئەوانەشی کە هاوکاریی مامۆستایان و قوتابیان بوون لەو کارەساتە سروشتییەدا. دەشڵێت: "ئەمڕۆ پارەی پێویست رادەستی پەروەردەی سلێمانی دەکرێت و بەزووترین  کات پێداویستییەکانیان بۆ جێبەجێ بکرێت."

 

وەزیری پەروەردە ئاماژەی بەوەشدا کە ئەم قوتابخانەیە (قوتابخانەی قەندیل لە تەکیە) کە قسەی تێدا دەکات، لە لافاوەکەدا تووشی زیان بووە و لەسەر ئەرکی دامەزراوەی کوردستان فاوندەیشن نۆژەن دەکرێتەوە.

 

وەزارەتی پەروەردە وەک هەنگاوی یەکەم لە سنوورەکە، پێداویستیی خوێندنی بۆ 2000 قوتابی ئامادە کردووە و وەزیری پەروەردەیش گوتی: "ئەمڕۆ رادەستیان دەکرێت."