ئاسایشی هەولێر: ئەو کەسەی گۆڕی کریستیانەکانی لە شەقڵاوە شێواند، دەستگیرکرا

 

ئەمڕۆ چوارشەممە، 17ـی کانوونی یەکەمی 2025، بەڕێوەبەرایەتیی ئاسایشی هەولێر لە راگەیێندراوێکدا وردەکاریی رووداوەکەی خستەڕوو و گوتی: "دوای ئەوەی لە رۆژی 13ـی کانوونی یەکەمی 2025 چەند کێلێکی گۆڕەکانی گۆڕستانیی کریستیانەکان لە شەقڵاوە شێوێندران، دامەزراوەکەمان لە ئەنجوومەنی ئاسایشی هەرێمی کوردستان دەستبەجێ دەستی بە لێکۆڵینەوە و بەدواداچوون کرد."

 

ئاسایشی هەولێر دەڵێت: "توانیمان ناسنامەی ئەنجامدەری ئەو کردەوەیە بەناوی (حوسێن ساڵح موستەفا) ئاشکرابکەین و بە فەرمانی دادوەر و لەلایەن تیمەکانمانەوە دەستگیرکراوە."

 

بەگوێرەی راگەیێندراوەکەی ئاسایش، تۆمەتبارەکە لەکاتی لێکۆڵینەوەکاندا "دانی بە تاوانەکەیدا ناوە کە لەژێر کاریگەریی خواردنەوە کحولییەکان ئەو کردەوەیەی کردووە".

 

سەبارەت بە پێشینەی تۆمەتبارەکە، بەڕێوەبەرایەتیی ئاسایشی هەولێر دەڵێ: "تۆمەتباری دەستگیرکراو لە ساڵی 2022 بە تۆمەتی سووتاندنی مەرقەدێک لەناو بازاڕی هەولێر دەستگیرکراوە و سزای یاسایی خۆی وەرگرتووە و پاشان ئازادکراوە."

 

بەگوێرەی ئەو ڤیدیۆیەی ئاسایشی هەولێر بڵاویکردووەتەوە، تۆمەتبارەکە چووەتە دووکانێکی فرۆشتنی خواردنەوە کحولییەکان و خواردنەوەی کحولی کڕیوە و دواتر چووەتە گۆڕستانەکە و بە بلۆک کێڵی گۆڕەکانی شکاندووە.

 

4ی ئەم مانگەش لە قەزای کۆیە ژمارەیەک گۆڕی کریستیانەکان لە گوندی هەرمۆتە شێوێندران و ئەوەش ناڕەزایی لێکەوتەوە.

 

د. عەبدوڵڵا شێرکاوەیی، گوتەبێژی یەکێتی زانایانی ئایینیی کوردستان، بە رووداوی گوت: "هەر جۆرە بێ رێزییەک بە مردوو  یان زیندوو وەک یەک تاوانە، چونکە دەچێتە خانەی سووکایەتی بە مرۆڤەوە و پێچەوانەی بنەماکانی شەریعەتی ئایینی پیرۆزی ئیسلامە."