28ـی شوبات لێخۆشبوونی 20%ـی پارەی سزاکانی هاتووچۆ کۆتایی دێت

 

ئەمڕۆ یەکشەممە بەڕێوەبەرایەتی هاتووچۆی هەولێر لە راگەیێندراوێکدا بڵاویکردەوە، هەر شوفێر یان هاووڵاتییەک دەیەوێت سوودمەند بێت لە داشکاندنی سزای هاتووچۆ، پێش تەواوبوونی کاتەکە سەردانیان بکات.

 

لێخۆشبوونی 20%ـی پارەی سزاکانی هاتووچۆ لەلایەن وەزارەتی ناوخۆی هەرێمی کوردستانەوە شەش مانگ لەمەوبەر دەرکراو و تەواوی بەڕێوەبەرایەتییەکانی هاتووچۆ لە هەرێمی کوردستان دەگرێتەوە.

 

لە نووسراوەکەی وەزارەتی ناوخۆدا کە 10-9-2023، بڵاوکرایەوە بڕیاردرا، لێخۆشبوونەکە لە رێککەوتی 28-8-2023ـەوە تاوەکو 28-2-2024 بەردەوام بێت. 

 

ئەوکات بڕیاردرا هەر کەسێک لە دوای 28ی شوبات، سزای ماددی هاتووچۆی بکەوێتە سەر و لە ماوەی مانگێک پارەکە نەدات، سزاکەی دەبێتە دوو هێندە، بەڵام رۆژی 22-01-2024 وەزارەتی ناوخۆ رایگەیاند، دووهێندەکردنی سزاکانی هاتووچۆ، راگیراوە.