سەرچاوەیەکی ئەمنی لە سلێمانی: فەرمانی لەفە و مام لەتیف دەستگیرکراون

 

 

ئەمڕۆ سێشەممە 18-02-2025، سەرچاوەیەکی ئاگادار لە هێزە ئەمنییەکانی سلێمانی بە تۆڕی میدیایی رووداوی گوت: "لەو هەشت کەسەی دەستگیرکراون دوو کەس بە ناوەکانی فەرمانی لەفە و مام لەتیف هەن".

 

ئەو دوو تۆمەتبارە کە لە تۆڕە کۆمەڵایەتییەکان ناسراون، هەفتەی رابردوو لە لایڤی تیکتۆکدا ناکۆکی کەوتە نێوانیانەوە و چەند وشەیەکی نەشیاویان دژی یەک بەکارهێنا، بەڵام دواتر فەرمانی لەفە لە تۆمارێکی ڤیدیۆییدا پەشیمانی دەربڕی و داوای لێبووردنی لە خەڵک و ئەوانە کرد گوێیان لە قسەکانی بووە.

 

دوێنێ بەڕێوەبەرایەتیی ئاسایشی پارێزگای سلێمانی رایگەیاند: "بەمەبەستی بەرەنگاربوونەوەی بڵاوکراوە نەشیاوەکان، بە بڕیاری بەڕێز داواکاری گشتی، هەشت تۆمەتباری خراپ بەکارهێنانی تۆڕە کۆمەڵایەتییەکانی دەستگیرکران، تۆمەتباران لە رێگەی گرتە ڤیدیۆیی و لایڤەکانیان بابەتی نەشیاویان بڵاوکردووەتەوە و کاریگەری نەرێنییان لەسەر تاک و خێزانەکان هەبووە".

 

ئاسایشی سلێمانی ئاماژەی بەوەشکردووە، بەپێی یاسا و بە بڕیاری دادوەر رووبەڕووی خراپ بەکارهێنەرانی تۆڕە کۆمەڵایەتییەکان دەبنەوە لەپێناو تێکنەدانی شیرازەی کۆمەڵگا.