هێرشێکی ئاسمانی کرایە سەر بارەگایەکی حەشدی شەعبی لە کەرکووک

 

رۆژی چوارشەممە، 18-03-2026، دەستەی حەشدی شەعبی لە راگەیێندراوێکدا هێرشکردنە سەر بارەگەی "کەتیبەکابی ئیمام عەلی" لە سنووری کەرکووک پشتڕاستکردەوە. بەگوێرەی راگەیێندراوەکە، کاژێر 21:00ی شەوی سێشەممە، 17-03-2026، هەلیکۆپتەرێکی ئەمریکی ناوچەی "جەرد"ی لە سنووری فەوجی سێیەمی لیوای 40ی بۆردوومان کردووە.

 

حەشدی شەعبی لەبارەی ئەنجامی هێرشەکە رایگەیاندووە: "هێرشەکە هیچ زیانێکی گیانی لێنەکەوتووەتەوە."

 

لەلایەکی دیکەوە، سەرچاوەیەکی ئەمنی لە کەرکووک بە رووداوی راگەیاند، هێرشەکە لە رێگەی هەلیکۆپتەری جۆری "ئەباچی"یەوە بووە و دەنگی تەقینەوەکە هێندە بەهێز بووە لە ناوچە دوورەکانیش بیستراوە. ئەو سەرچاوەیە ئاماژەی بەوەشکرد، پاش رووداوەکە هێزە ئەمنییەکان چواردەوری شوێنەکەیان گرتووە و لێکۆڵینەوەیان بۆ زانینی وردەکارییەکان دەستپێکردووە.

 

ئەمە چەندەمین جارە لە ماوەی یەک هەفتەدا بارەگای لیوای 40ی حەشدی شەعبی لە میحوەری دووبز - بای حەسەن دەکرێتە ئامانج. پێشتر و لە بەرەبەیانی رۆژی هەینی، 13-03-2026، هەمان بارەگا لە رێگەی فڕۆکەی بێفڕۆکەوانەوە (درۆن) بۆردوومان کرا و بەهۆیەوە ژمارەیەک چەکدار بریندار بوون.