کار گرووپ گرێبەستی لەگەڵ چوار کۆمپانیای ئەمریکی واژۆ کرد
رووداو دیجیتاڵ
جێگری سەرۆکی کۆمپانیای کار دەڵێت، لە سەردانەکەیاندا بۆ واشنتن، لێکتێگەیشتنی باشیان لەگەڵ کۆمپانیاکانی ئەمریکی بۆ کاری هاوبەش هەبووە. گوتیشی، گرێبەستەکانیان تایبەتن بە پاڵاوتن و پەرەپێدانی کێڵگەکان.
شێخ مەحموود رەئووف بەرزنجی، جێگری سەرۆکی کۆمپانیای کار قسەی بۆ دیار کوردە، بەرپرسی نووسینگەی تۆڕی میدیایی رووداو لە واشنتن کرد و گوتی، ''لە سەردانەکەماندا گرێبەستمان لەگەڵ چوار کۆمپانیای ئەمریکی واژۆ کردووە.''
بەگوتەی شێخ مەحموود رەئووف بەرزنجی، گرێبەستەکان تایبەتن بە پڕۆژەکانی پاڵاوتن و پەرەپێدانی کێڵگەی نەوت و گاز و چەند بواری دیکە.
لەبارەی هەرێـمی کوردستانیشەوە جێگری سەرۆکی کۆمپانیای کار گوتی، ''لەگەڵ کۆمپانیای KBRـی ئەمریکی رێککەوتووین ناوەندێکی راهێنان بکرێتەوە، بۆ ئەوەی لە بوارەکانی نەوت و گاز راهێنان بە گەنجەکانمان بکرێت.''
کۆمپانیای کار لە ساڵی 1999 دامەزراوە و زۆرترین پرۆژەکانى، لە بوارى نەوت و گاز و بەرهەمهێنانى کارەبایە، یەکێک لە کارەکانى لەو چوارچێوەیەدا چارەسەرکردنى سووتانى گازى هاوەڵى دەرکراوى کێڵگەکانى نەوتە لە هەرێمى کوردستان.
بۆ تاوتوێکردنی پەیوەندییەکانی نێوان وڵاتەکانیان لە رووی ئابووری، ئەمنی و سیاسییەوە، سوودانی لەسەر بانگهێشتی فەرمیی جۆ بایدن، سەرۆکی ئەمریکا لەگەڵ شاندێکی فرەبوار لە 13ی نیسان گەیشتە واشنتن.