فێستیڤاڵی ئەسپسواری لە بناری چیای کارۆخ سازکرا

 

ژمارەیێک هاونیشتمانیی خەڵکی وەرتێ بۆ بەشداریکردن لە فێستیڤاڵی ئەسپسواریی شارۆچکەکەیان بە توولەڕێیەکی باریک و سەختدا بەرەو بناری چیای کارۆخ رێیانکرد، ئەوان کاژێرێک رێگەیان بەپێ بڕی تاوەکو گەیشتنە شوێنی فێستیڤاڵەکە.

 

رزگار جەلال، رێکخەری فێستیڤاڵەکە بە رووداوی گوت "بۆ ئەوەی بتوانین فۆلکلۆری کوردی و رەسەنایەتی بپارێزین، ئەو فێستیڤاڵەمان سازکرد. ئەمساڵ نمایشی ئەسپسواریشی تیدابوو و خەڵک زۆر هاتوون، دڵنیام ساڵی داهاتووش زۆر قەرەباڵختر دەبێت."

 

ئەوانەی لە فێستیڤاڵەکەدا بەشدار بوون، لە ناوچە و شوێنی جیاوازەوە هاتبوون.

 

ئەحمەد عەبدولقادر بەشداربوویێکی فێستیڤاڵەکە دەڵێ بەو جۆرە فێستیڤاڵانە سۆز و بەزەیی زیاتر دەبێت "ئێستا خەڵک ساڵانەش یەکدی نابینن ئەگەر ئەو چالاکییانە نەبن. ئەو فێستیڤاڵە زۆر زۆر گرنگە بۆ یەکتربینین و ئاشنابوونەوە لەگەڵ یەکتر، لەو گۆڕەپانە سەوزەدا، لەهەر لایەک خێزانێک دانیشتووە."

 

بن رەشماڵەکانیش پڕ بوون لە ئامادەبووان، خەڵک چێژیان لە سەیرکردنی نمایشی ئەسپسواران و میوزیک و خواردنی خۆراکی کوردەواری بینی و، بەئومێدی ئەوەن هەموو ساڵێک دووبارە بکرێتەوە.

 

بوشرە حەسەن، بەشداربووی فێستیڤاڵەکە دەڵێ "زۆر گرنگ و پێویستە، چونکە سەردەمێک باوباپیرانمان لێرە خەباتیان کردووە و بژێوی ژیانیشیان لێرە دابین کردووە، زۆریش پێویستە بۆ منداڵانمان و نەوەکان ئەو دابونەریت و ناوچەیە ببینن."

 

لە بەرەبەیان تاوەکو درەنگانی ئێوارە، بناری ئەو چیا سەرکەشە بە دەنگی گۆرانی و حەیران و نمایشی سوارچاکان ئاوەدان و پڕ جموجۆڵ بوو. ئێوارە، هەمان ئەو توولەڕێیەی پێیدا سەرکەوتن بووەوە رێی گەڕانەوەیان.