126 خێزانى شنگالی گەڕانەوە زێدی خۆیان
رووداو دیجیتاڵ
126 خێزانى دیکەى شنگالی لە کەمپێکى هەرێمى کوردستانەوە گەڕانەوە بۆ سنووری شنگال. بە گوێرەى وەزارەتى کۆچ و کۆچبەرانى عێراق، 21 هەزار خێزانى ئاوارە ماون بگەڕێنەوە.
ئەمڕۆ یەکشەممە، 18ى ئایارى 2025، عەلى جەهانگیر، گوتەبێژى وەزارەتى کۆچ و کۆچبەرانى عێراق بە تۆڕى میدیایی رووداوى راگەیاند: "ئەو 126 خێزانە لە 617 کەس پێکهاتبوون و لە کەمپى خانکێ لە سنوورى پارێزگاى دهۆک بوون و ئەمڕۆ گەڕێندرانەوە قەزاى شنگال".
عەلى جەهانگیر گوتى:"لەگەڵ دەستپێکردنى پشووى قوتابخانە، گەڕانەوەى ئاوارەکان زیاتر دەبێ".
ئەو ئاوارانەى شنگال لە هاوینی ساڵى 2014 چوونە هەرێمی کوردستان، دواى ئەوەى رێکخراوى داعش هێرشی کردە سەر سنوورەکەیان.
عەلى جەهانگیر رایگەیاند: "تاوەکو ئێستا زیاتر لە 13 هەزار خێزانی شنگالی کە لە کەمپەکانى هەرێمى کوردستان بوون، گەڕاونەتەوە و 21 هەزار خێزان ماون بگەڕێنەوە".
وەزارەتى کۆچ و کۆچبەرانی عێراق لەکاتى گەڕانەوەى هەر خێزانێکى ئاوارە بۆ زێدى خۆى چوار ملیۆن دینار، تەباخ، بەفرگر و تەلەڤزیۆنێکی پێدەدات.