لە شەڕی نێوان دوو بنەماڵەدا لە باکووری کوردستان 41 کەس برینداربوون

شەڕەکە لە شارۆچکەی بەشیری سەر بە پارێزگای ئێلیهـ لە نێوان دوو بنەماڵەدا روویدا و لە ئەنجامدا 41 کەس برینداربوون کە تەندروستیی 6یان جێگیر نییە. 16 کەس لەوان بە چەقۆ و تەور برینداربوون. 

 

هەرچەندە هۆکاری سەرەکیی دروستبوونی شەڕەکە نەزانراوە، بەڵام بەگوێرەی زانیارییە سەرەتاییەکان، سەرەتا دەمەقاڵە لەنێوان ژمارەیەک گەنجی هەردوو بنەماڵەکەدا لەنێو کافتریایەکدا دروستبووە و دواتر کەسوکاری زیاتری گەنجەکان تێکەڵی شەڕەکە بوون. 

 

شەڕەکە سەرەتا بە بۆکز بووە، بەڵام دواتر پەنا براوەتە بەر چەقۆ، تەور، دار و بەرد و چەک.

 

تاوەکو ئێستا لایەنی فەرمی روونکردنەوەی لەبارەی هۆکاری هەڵگیرسانی شەڕەکە نەداوە، بەڵام هێزەکانی پۆلیس و جەندرمە لەو ناوچەیە بڵاوەیان پێکراوە و 14 کەس دەستگیرکراون و لێکۆڵینەوەیان لەگەڵ دەکرێت.