سەرۆک بارزانی بۆ کەسوکاری قوربانییانی کەرکووک: خوێنی ئەو ئەزیزانە بەفیڕۆ ناچێت

رووداو
 
رووداو دیجیتاڵ

لە سەلاحەدین سەرۆك مەسعود بارزانی پێشوازیی لە بنەماڵە و كەسوكاری شەهیدان و بریندارانی رووداوەكانی ئەمدواییەی كەركووك كرد و پێی راگەیاندن، "خوێنی ئەو ئازیزانە بەفیڕۆ ناچێت و پێویستە تاوانباران سزای یاسایی خۆیان وەربگرن."
 
بەگوێرەی راگەیێندراوێکی بارەگای بارزانی کە رۆژی دووشەممە 18ی ئەیلوولی 2023 بڵاویکردووەتەوە، "لە دیدارەكەدا سەرۆك بارزانی پرسە و سەرەخۆشی و هاوخەمیی خۆی ئاراستەی خانەوادەی شەهیدان و برینداران كرد و جەختی لەوە كردەوە، كە خوێنی ئەو ئازیزانە بەفیڕۆ ناچێت و پێویستە تاوانباران سزای یاسایی خۆیان وەربگرن."
 
سەرۆك بارزانی ئاماژەشی بەوە دا، "خوێنی ئەو شەهیدانە و دەنگی ناڕەزاییتان پەیامێكی روون بوو بۆ هەموو لایەك كە كورد گەلێكی زیندوو و هۆشیارە و پێویستە سنوورێك بۆ ئەو زوڵم و ناهەقییە دابنرێت كە لە دژی هاووڵاتییانی كورد لە كەركووك دەكرێت."
 
وەکو سەرۆک بارزانی ئاماژەی پێداوە، "بەردەوامبوونی ئەو دۆخە ناسرووشتییەی لە كەركووك هەیە، مانای ئەوە نییە كە دەستبەرداری ناسنامەی كەركووك دەبین، چونكە كەركووك بۆ هەموو تاكێكی كورد رەمزێكی گەورەیە. دەبێت كەركووك بۆ هەمووان بێت و ببێتە نموونەی پێكەوەژیان و برایەتی و تەبایی و ئەو گرفتانەی كە ئێستا لەئارادان بە خۆسەپاندن و تووندوتیژی چارەسەر ناكرێت، بەڵكو دەبێت بۆ چارەسەری كێشەكان زمانی عەقڵ و مەنتیق بەكاربهێندرێت."
 
 
لە بەشێكی دیکەی قسەکانیدا سەرۆك بارزانی ئەوەی خستووەتەڕوو، بە قووڵی لە ئێش و ئازارەكانی هاووڵاتییانی كورد لە كەركووك تێدەگات و داواشی كرد، "بە هیچ شێوەیەك رێگە بە سەركەوتنی ئەو هەوڵە نامەسئولانە نەدرێت كە نیەتی ئەوەیان هەیە ناكۆكییە سیاسییەكانی لایەنەكان بكەنە ناكۆكی و ململانێی نەتەوەیی نێوان پێكهاتەكانی كەركووك."
 
لە 27ی ئابی 2023وە بەشێک لە تورکمان و عەرەبی کەرکووک هەفتەیەک رێگەی سەرەکیی شارەکەیان لەگەڵ هەولێر داخست. ئەوان دژى رادەستکردنەوەى بارەگاى ئەنجوومەنى سەرکردایەتیى پارتى دیموکراتى کوردستانن لەو شارە کە ئێستا بارەگاى ئۆپەراسیۆنەکانى کەرکووکە.
 
بەهۆى ئەو رێگە داخستنەوە، رۆژی 02-09-2023 ژمارەیەک هاونیشتمانیی کوردی کەرکووک خۆپێشاندانیان کرد و چوار خۆپێشاندەر بە گولـلە گیانیان لەدەستدا و 16ی کەسی دیکەش برینداربوون.