بەربژێرەکەى حیزبى شیوعى کوردستان لە خورماتوو: 870 دەنگم بەدەستهێناوە

 

هێمن بارزان داودی، بەربژێرى حیزبى شیوعی کوردستان لە سنوورى پارێزگا سەڵاحەدین ئەمڕۆ سێشەممە، 19-12-2023، بە تۆڕى میدیایی رووداوى گوت، "بە گوێرەى لیستى فەرمى ئەنجامەکانى دەنگدانى گشتى کە بە دەستم گەیشتووە، لە سنوورى قەزاى خورماتوو 870 دەنگم بەدەستهێناوە".

 

هێمن بارزان گوتیشى، "هێشتا دەنگى قەزاکانى دیکە ماوە بەدەستم بگەن".

 

لە سنوورى پارێزگاى سەڵاحەدین سێ بەربژێرى کورد لە سێ لیستى جیاوازدا بەشدارى هەڵبژاردنى ئەنجوومەنى پارێزگاکانیان کرد. یاسین داودى، بەربژێرى یەکێتی لە نێو لیستى جەماهیريى وەتەنى؛ تارا داودى، بەربژێرى پارتی لەنێو لیستى حەسمى نیشتیمانی و هێمن بارزان داودى، بەربژێرى حیزبى شیوعی لە لیستى ریئاسە.

 

بەگوێرەى ئەنجامە بەراییەکان، بەربژێرەکەى یەکێتى زیاتر لە هەشت هەزار و  500 دەنگى بەدەستهێناوە؛ بەربژێرەکەى پارتیش 1100 دەنگى بردووەتەوە.

 

ئەنجوومەنى پارێزگاى سەڵاحەدین 15 کورسیە، 703 هەزار و 563 کەس بۆ دەنگدانى گشتى مافى دەنگیانیان هەبوو و رێژەى بەشدارىش لەهەڵبراردن بە هەردوو دەنگدانى گشتى و تایبەت 59% بوو.