کەسێک لەنێو مزگەوتێکی ئامەد بە چەقۆوە هەڕەشە لە ژمارەیەک منداڵ دەکات

 

رووداوەکە، کاژێر 17:30ـی ئێوارەی رۆژی 13ـی شوباتی 2024، لەنێو مزگەوتی فاتیح لە گەڕەکی فاتیح-ی شارۆچکەی باغلار سەر بە ئامەد روویدا. قوتابییانی خولی خوێندنی قورئان بەر لە هاتنی مامۆستاکەیان، لەنێو خۆیاندا یارییان دەکرد و دەنگیان بەرز ببووەوە. وەک لە گرتەکانی کامێرای چاودێریی مزگەوتەکەدا دەردەکەوێت، کەسێکی بە تەمەن دێت و هۆشدارییان پێدەدات دەنگ بەرز نەکەنەوە. 

 

دوای ماوەیەک لە بێدەنگی، منداڵان دووبارە دەست بە یاریکردن دەکەن و دەنگیان بەرز دەبێتەوە. هەمان کەس دووبارە دێتە ژوورەوە، بەڵام چەقۆیەک دەردەهێنێت و بەمەبەستی ترساندنی منداڵەکان چەند جارێک چەقۆکە دەوەشێنێت. منداڵەکان دەشڵەژێن و هەرچەندە هەوڵی خۆ رزگارکردن دەدەن، بەڵام ئەو، لە نزیک دەرگە دەوەستێت و رێگەیان پێنادات بچنە دەرەوە و بە دەم هاوارکردنەوە پێیان دەڵێت، "پێمگووتن، بێدەنگ بن، بەڵام بێدەنگ نەبوون". 

 

دوای هەوڵێکی زۆر، منداڵەکان خۆیان رزگار دەکەن و بۆ دەرەوە هەڵدێن. مێرمنداڵێک لە ژوورەکەدا گیردەخوات بەدەست چەقۆ کێشەکە و لە کامێرای چاودێریی مزگەوتەکدا دەردەکەوێت کە چەقۆکەی لە دەموچاوی مێرمنداڵەکە نزیک دەکاتەوە و قسەی پێ دەڵێت، دوای ماوەیەک ئەویش خۆی دەکاتە دەرەوە. 

 

ئەم گرتە ڤیدیۆییە، شەوی رابردوو 18ـی مانگ ئاشکرا دەبێت و پۆلیسی ئامەد سەبارەت بە رووداوەکە دەستی بە لێکۆڵینەوە کردووە.