کەشناسی: باران و خۆڵ دەبارێت

 

 

رۆژی سێشەممە، کەشناسیی هەرێمی کوردستان رایگەیاند: "دوای نیوەڕۆ ئاسمان دەبێتە هەوری تەواو، لە بەشێک لە ناوچە جیاکانی سەنتەری پارێزگاکان، ئیدارە سەربەخۆکان، ناوچە شاخاوی؛ نیمچە شاخاوی و دەشتەکان کاریگەری تاوەباران و چالاکبوونەوەی هەورە برووسکە دەبێت؛ هەندێک کات لێزمەبارانی کورتخایەن دەبارێ".

 

بە گوێرەی کەشناسیی هەرێمی کوردستان، ئەمڕۆ خۆڵبارین لە ناوچەکانی ئیدارەی گەرمیان، پارێزگای کەرکووک و ناوچە دەشتاییەکانی پارێزگای هەولێر دەبێت.

 

سالار حاجی عەلی، شارەزای کەشناسی، ئەمڕۆ سێشەممە بە تۆڕی میدیایی رووداوی گوت: "ئەمڕۆ لە نێو شارەکان بە بڕی جیاواز باران دەبارێت، بە تایبەتی لە ناوچە سنووری و شاخاوییەکان".

 

ئەو شارەزایەی کەشوهەوا پێشبینی دەکات لە سەنتەری شارەکان خێرای با زیاد بکات و ئاماژە بەوەدەکات: "لە کەرکووک هەورە برووسکە و ئەگەری بارانی کەم و مامناوەند هەیە، لە هەولێر دڵۆپە باران دەبارێ و هەورە بروسکە دەبێت، لە دهۆک پێشبینی دەکرێ بارانی زیاتر ببارێ، هەروەها لە سلێمانی ئەگەری بارانی مامناوەند و هەورە برووسکە هەیە؛ لە هەڵەبجەش چاوەڕوان دەکرێت باران و هەورە برووسکە بێت".

 

لەبارەی کەشوهەوای سبەیەوە کەشناسیی هەرێمی کوردستان دەڵێت: "ئەگەری کەمێک باران لە ناوچە شاخاوییەکان هەیە لەگەڵ بوونی هەورەبرووسکە لەسەر لووتکەی ناوچە شاخاوییەکان".

 

 

هەولێر: 27 پلەی سیلیزی

سلێمانی: 27 پلەی سیلیزی

کەرکووک: 30 پلەی سیلیزی

دهۆک: 26 پلەی سیلیزی

هەڵەبجە: 29 پلەی سیلیزی

پیرمام: 24 پلەی سیلیزی

سۆران: 18 پلەی سیلیزی 

حاجی ئۆمەران: 14 پلەی سیلیزی 

چەمچەماڵ: 29 پلەی سیلیزی

زاخۆ: 26 پلەی سیلیزی 

گەرمیان: 31 پلەی سیلیزی