وێستگەی پاڵاوتنی ئاوەڕۆ بۆ بووژاندنەوەی دەریاچەی ورمێ دەست بە کار دەکات

 

 

محەممەد سادق موعتەمدیان، پارێزگاری ورمێ رایگەیاند، "تێست و تاقیکارییەکانی تەواو بوون و ئامادەیە بکرێتەوە و کەڵکی لێوەربگیرێت. بە جیدی دەمانەوێت، پڕۆژە نیوەچڵەکانی ژیاندنەوەی دەریاچەی ورمێ تەواو بکەین."

 

ئەم پڕۆژەیە ساڵی 2015 دەست بە جێبەجێکردنی کرا، بەڵام لەبەر نەبوونی بودجە کارەکانی بۆ ماوەی چەند ساڵێک راوەستا. ئەم وێستگەی پاڵاوتنە وەکو یەکێک لە پڕۆژە سەرەکییەکانی حکومەت بۆ ژیاندنەوەی دەریاچەی ورمێ لە قەڵەم دەدرێت.

 

پارێزگاری ورمێ دەڵێت، "ئەم پڕۆژەیە چەند قازانجێکی هەیە. قازانجی یەکەم لایەنی تەندروستی و ژینگەییە؛ دووەمیش پەیوەندیی بە ژیاندنەوەی دەریاچەی ورمێوە هەیە. ئەم پڕۆژەیە 51 ملیۆن مەتر سێجا ئاوی خاوێنکراوەی ئاوەڕۆ رەوانەی دەریاچەی ورمێ دەکات."

 

بەڵام ئەم بڕە ئاوە بۆ ژیاندنەوەی دەریاچەی ورمێ زۆر کەمە. بە گوتەی مستەفا فەدایی فەرد، ئەندامی دەستەی دامەزراوەی ژیاندنەوەی دەریاچەی ورمێ دەڵێت، "بۆئەوەی ئاستی ئاوی دەریاچەکە بگاتە ئاستێک کە بوونەوەران تێیدا بژین، ساڵانە پێویستی بە چوار ملیار مەتری سێجا ئاوە."

 

دەریاچەی ورمێ پێویستی بە 14 ملیار مەتری سێجا ئاوە بۆئەوەی بگاتە ئەو ئاستە، بەڵام ئێستا نزیکەی دوو ملیار مەتری سێجا ئاوی تێدایە. دەریاچەکە ساڵی 1996 نزیکەی 33 ملیار مەتری سێجا ئاوی تێدابووە.

 

تونێلی کانی سێو کە یەکێک لە گەورەترین پڕۆژەکانی حکومەت بۆ ژیاندنەوەی دەریاچەی ورمێیە، ساڵانە 600 ملیۆن مەترسی سێجا ئاو بۆ دەریاچەی ورمێ دەگوازێتەوە.

 

دۆخی دەریاچەی ورمێ بەرهەمی وشکەساڵی و ساڵانێک پەرەسەندنی ناهاوسەنگ لە بواری کشتوکاڵدایە. رووبارەکانی دەریاچەی ورمێ بەنداویان لەسەر دروستکراوە و 80 هەزار بیری ئاوی نایاسایی لە ناوچەی رێژاوی دەریاچەکەدا هەن، کە ئاوی دەریاچەکەیان هەڵمژیوە.