نێچیرڤان بارزانی پیرۆزبایی سەرکەوتنی کۆنگرەی بزووتنەوەی ئیسلامی لە عيرفان عه‌بدولعه‌زيز دەکات

 

رۆژی پێنجشەممە، 19-10-2023، سەرۆکایەتیی هەرێمی کوردستان راگەیێندراوێکی بڵاوکردەوە و دەڵێت، نێچیرڤان بارزانی، سەرۆکی هەرێمی کوردستان پەیوەندی بە عیرفان عەبدولعەزیز، رابەری بزووتنەوەی ئیسلامیی کوردستانەوە کردووە و بەبۆنەی سەرکەوتنی کۆنگرەکەیان و هەڵبژاردنی بە سەرۆکی بزووتنەوەکە، پیرۆزبایی لێکردووە. 

 

لە راگەیێندراوەکەی سەرۆکایەتیی هەرێمی کوردستاندا هاتووە، رابەری بزووتنەوەی ئیسلامیی کوردستان لە پەیوەندییە تەلەفۆنیەکەدا سوپاسی سەرۆکی هەرێمی کوردستانی کردووە و پێزانینی دەربڕیوە. 

 

رۆژی سێشەممە، 3ـی تشرینی یەکەمی 2023، کۆنگرەی بزووتنەوەی ئیسلامیی کوردستان لەژێر ناونیشانی "کۆنگرەی دامەزراندن" لە سلێمانی بەڕێوەچوو. 

 

لە کۆنگرەکەدا، عیرفان عەلی عەبدولعەزیز 986 دەنگی بەدەستهێنا و بە رابەری بزووتنەوەکە هەڵبژێردرا و رکابەرەکەی کامیل حاجی عەلی کە بایکۆتی کۆنگرەکەی کردبوو، 15 دەنگی کۆنگرەی بەدەستهێنا. 

 

بەشێک لە ئەندامانی کۆنگرەی بزووتنەوە کە لە کامیل حاجی عەلییەوە نزیک بوون، بایکۆتکردنی کۆنگرەیان راگەیاند و لە کۆنگرەیەکی رۆژنامەڤانیدا رایانگەیاند، بەشداریی کۆنگرەکە ناکەن و ژمارەیەک هۆکاریان وەک پاساو هێنایەوە و رابەری ئێستای بزووتنەوەی ئیسلامی (عیرفان عەلی عەبدولعەزیز)ـیشیان بە "ساختەکاری و شاردنەوەی راستییەکان" تۆمەتبارکرد. 

 

لە بەرامبەر تۆمەتبارکردنی بە ساختەکاری لە کۆنگرەکەدا، عیرفان عەلی عەبدولعەزیز لە بەرنامەی(رووداوی ئەمڕۆ)ـی تۆڕی میدیایی رووداودا کە رۆژی 03-10-2023 پەخشکرا، ئەو تۆمەتانەی بە بێ بنەما ناوبرد و گوتی، لە کۆنگرەدا هیچ سەرپێچییەکی یاسا، رێنماییە بەرکارەکان و رێکارەکانی کۆمیسیۆن نەکرا و نوێنەری کۆمیسیۆن چاودێریی پرۆسەکەی کردووە.