لە کەرکووک کەسێک کە هەڕەشەی لە دادوەر و بەرپرسانی ئەمنیی هەرێمی کوردستان کردبوو دەستگیرکرا

 

عامر نووری، گوتەبێژی پۆلیسی پارێزگای کەرکووک، رۆژی یەکشەممە، 19-11-2023، رایگەیاند، دوێنێ شەممە، هێزی سواتی پۆلیسی کەرکووک لەگەڵ هێزە ئەمنییەکانی دیکەی شاری کەرکووک کەسێکیان دەستگیرکردووە، خۆی وەک ئەفسەر بە پلەی عەمید ناساندووە و هەڕەشەی لە ژمارەیەک بەرپرس و کەسایەتی دیارکردووە لەوانە دادوەر و بەرپرسانی ئەمنیی هەرێمی کوردستان.

 

بەپێی زانیارییەکانی تۆڕی میدیایی رووداو ئەو کەسەی دەستگیرکراوە ناوی (س)ـە و لە نەتەوەی کوردە. 

 

هەر لەوبارەوە، بەڕێوەبەرایەتیی هەواڵگری و ئاسایشی سەر بە وەزارەتی بەرگری عێراق، رۆژی یەکشەممە 19-11-2023 لە راگەیێندراوێکدا بڵاویکردەوە، بەپێی زانیاری هەواڵگری ورد ، هێزەکانی بەڕێوەبەرایەتیی هەواڵگری و ئاسایشی کەرکووک ، کەسێکیان دەستگیرکردووە کە بە فێل خۆی وەک ئەفسەر بە پلەی عەمید ناساندووە، دنەی خەڵکی داوە، سەرپەرشتیی تۆڕێکی کردووە لەو رێگەیەوە فێڵی لە خەڵک کردووە. 

 

بەڕێوەبەرایەتی هەواڵگری و ئاسایش، دەڵێت، ئەو تۆمەتبارە چەندین یاداشتی دەستگیرکردنی لەسەر کەیسی جیاجیا بۆ دەرکراوە، دواتر لە بۆسەیەکدا لە نێو شاری کەرکووک دەستگیرکراوە. دوای دەستگیرکردنیشی وتەی لێوەرگیراوە و دانی بەوە داناوە کە لە چەند پارێزگاکایەک تاوانی کردووە، بۆیە دراوەتە دادگە بۆ ئەوەی سزای دادپەرەوەرانەی خۆی وەربگرێت.