مارکۆ روبیۆ: بەبێ چەککردنی حەماس ئاشتی لە غەززە بەدەست نایەت

 

رۆژی هەینی 19-12-2025، مارکۆ روبیۆ لە واشنتن لەبارەی دۆخی غەززە هۆشداری دا و گوتی: "ئەگەر حەماس لە داهاتوودا لە پێگەیەکدا بێت کە بتوانێ هەڕەشە لە ئیسرائیل بکات یان هێرشی بکاتەسەر، ئەوا ئاشتی بەدەستنایەت؛" ئاماژەی بەوەشکرد، هەر لەبەر ئەم هۆکارەیە پرسی "داماڵینی چەک" هێندە هەستیار و گرنگە.

 

 

سەبارەت بە داهاتووی ئاسایش لە کەرتی غەززە، وەزیری دەرەوەی ئەمریکا گەشبینیی خۆی نیشاندا کە وڵاتان ئامادەن هێزەکانیان بۆ بەشداریکردن لە (هێزی جێگیرکردنی ئاشتی) رەوانە بکەن. روبیۆ گوتی: "زۆر دڵنیام کە کۆمەڵێک وڵاتمان هەیە لای هەموو لایەنەکان قبووڵکراون و ئامادەن بێنە پێشەوە و ببنە بەشێک لەو هێزی جێگیرکردنە."

 

 

مارکۆ روبیۆ تیشکی خستە سەر دۆخی ڤەنزوێلا و رایگەیاند، مانەوەی دۆخەکە بەو شێوەیەی ئێستا "بەرگەنەگیراوە" و دەبێت بگۆڕێ؛ روبیۆ ئاماژەی بەوە کرد کە ئەمریکا نیگەران نییە لە هەر بەهێزبوونی پێگەی رووسیا لە ناوچەکەدا و گوتی: "رووسیا ئێستا سەرقاڵی جەنگی ئۆکرانیایە و کاتی بۆ شتی دیکە نییە."

 

لەبارەی رێگەگرتن لە جووڵەی کەشتییە نەوتهەڵگرەکانی ڤەنزوێلاش، روبیۆ گوتی: "هیچ شتێک نابێتە بەربەست لەبەردەم توانای ئێمە بۆ جێبەجێکردنی یاساکانی ئەمریکا لە پرسی سزاکاندا. ئێمە فەرمانی دادگاکەمان لەبەر دەستە و جێبەجێی دەکەین."

 

 

سەبارەت بە جەنگی رووسیا و ئۆکرانیا، وەزیری دەرەوەی ئەمریکا ئەو دەنگۆیانەی رەتکردەوە کە گوایە واشنتن دەیەوێ رێککەوتنێک بەسەر کیێڤدا بسەپێنێت. روبیۆ گوتی: "ئەو دەنگۆیەی دەڵێ ئێمە گوشار لە ئۆکرانیا دەکەین، پێکەنیناوییە. ئێمە ناتوانین نە ئۆکرانیا و نە رووسیا ناچاربکەین رێککەوتن بکەن؛ دەبێت خۆیان بیانەوێ ئەو کارە بکەن."

 

لەکۆتاییشدا، مارک روبیۆ ئاماژەی بە کێشە سنوورییەکانی باشووری رۆژهەڵاتی ئاسیا کرد و هیوای خواست تاوەکو رۆژی دووشەممە یان سێشەممەی هەفتەی داهاتوو، تایلەند و کەمبۆدیا بگەنە رێککەوتن بۆ نوێکردنەوەی ئاگربەست و کۆتاییهێنان بە پێکدادانەکانی نێوان هێزەکانیان؛ گوتیشی: "بە گەشبینییەوە دەڕوانینە ئەو پرسە.