هاتووچۆی سیتەک بۆ هاونیشتمانییان: مەیەن بۆ سیتەک و رێگەی شاخی ئەزمڕ بەکارمەهێنن

 

دووشەممە، 20-01-2024 شەپۆلێکی بەفربارین بەشێکی هەرێمی کوردستانی گرتەوە بە تایبەت ناوچە شاخاوییەکان، هاونیشتمانییان بۆ کاتبەسەر بردن روویان لەو ناوچانە کرد.

 

موقەدەم هەرێم نەجات، بەرپرسی بنکەی هاتووچۆی سیتەک لە پارێزگای سلێمانی رایگەیاند: "بەهۆی بەفربارینەوە لەسەر رێگەی توونێلی پێشڕەو بەرەو سیتەک، ئاستەنگ دروست بووە" تیمەکانیان سەرقاڵی پاککردنەوە و کردنەوەی رێگەکەن.

 

بەرپرسی بنکەی هاتووچۆی سیتەک هاونیشتمانییان ئاگادار دەکاتەوە کە بۆ کاری زۆر پێویست نەبێت سەردانی سیتەک نەکەن، لەبەر ئەوەی ئاستەنگی هاتووچۆ هەیە و هاوکات رێگای شاخی ئەزمەڕیش بەکارنەهێنن.

 

هاوکات لە پۆستێکی تۆڕی کۆمەڵایەتیی فەیسبووک، هاتووچۆی پێنجوێن داوا لە شۆفێران دەکات: "رێگەی شاخی ملەکەوە ئاستەنگی هاتووچۆ دروست بووە و هاتووچۆی لێوە مەکەن."

 

بەڕێوەبەرایەتیی کەشناسی و بوومەلەرزەزانیی هەرێمی کوردستان بڵاویکردەوە "رۆژی دووشەممە، 20-1-2025 لە زۆربەی ناوچەکان، ئاسمان بەتەواوی هەور دەبێت و باران دەبارێت؛ بەفر لە زۆربەی ناوچە شاخاوییەکان دەبارێت. پلەی گەرما 6 بۆ 7 پلە دادەبەزێت و لە ناوچە شاخاوییەکان دەچێتە ژێر سفر."

 

کەشناسیی هەرێمی کوردستان لەبارەی باران و بەفرەوە دەڵێت، لەناوچە سنوورییەکانی باکوور و رۆژهەڵات بڕەکەی زیاتر دەبێت. لە شاری سلێمانی پێشبینیی تێکەڵەى بەفر و باران بۆ ماوەیەکی کورت دەکرێت.