ئاهەنگی نەورۆز لە هەموو پارچەکانی کوردستان بەڕێوەدەچێت

 

 

لە هەموو ناوچەکانی کوردستانی گەورەدا بە شێوەی جۆراوجۆر ئامادەکاری دەکرێت و هاونیشتمانییان خۆشحاڵی دەردەبڕن، بەڵام تەنیا لە باشووری کوردستان بە ئازادی و بەبێ دانانی هیچ سانسۆر و سنوورێک ئەو یادە دەکرێتەوە.

 

لەوەتەی کوردستانی گەورە دابەشکراوە، یادکردنەوەی نەورۆز لەلایەن ئەو حکومەتانە قەدەخەکراوە کە کوردستانیان بەسەردا دابەشکراوە.

 

لە رۆژهەڵاتی کوردستان، هەرچەندە بە یاسا ئەو یادە قەدەخە نەکراوە، بەڵام لە سەردەمی پاشایەتیدا ئەو یادە کەمێک ئازاد بووە، دوای سەرکەوتنی "شۆڕشی ئیسلامی"، یادی نەورۆز سنووردار کراوە و رێگری لە گردبوونەوە و ئاهەنگی گەورە دەکرێت، سەرەڕای بەربەستەکان، هاونیشتمانیان ئاگری نەورۆز دەکەنەوە و ئاهەنگ دەگێڕن.

 

لە کوردستان، بە ئاگرکردنەوە و ئاهەنگ و هەڵپەڕکێ پێشوازی لە یەکەم رۆژی ساڵی نوێی کوردی دەکرێت. لە رۆژئاوای کوردستان، ئەو یادە قەدەخە کراوبوو، بەڵام هاونیشتمانییان سوور بوون لەسەر ئەوەی یادەکە بکەنەوە، حکومەتی ئەوکاتی سووریا لە ناوەڕاستی هەشتاکانی سەدەی رابردوودا، ئاهەنگگێڕانی لە نەورۆزدا قەدەخە کرد، ئەو بڕیارە ناڕەزایەتیی لێکەوتەوە و هاونیشتمانیان بۆ دەربڕینی ناڕەزایەتی لەبەردەم کۆشکی کۆماری کۆبوونەوە، بە تەقەی هێزەکانی پاسەوانی کۆماری، سلێمان عادێ، شەهیدکرا، کە دواتر بە یەکەم شەهیدی نەورۆز ناسێندرا. دوای ئەو رووداوە، حافز ئەسەد، سەرۆککۆماری ئەوکاتەی سووریا رۆژی نەورۆزی کردە جەژنی دایک، بۆئەوەی بکرێتە پشووی فەرمی.

 

لەدوای ساڵی 1986ـەوە لە رۆژئاوای کوردستان یادی نەورۆز کراوەتەوە، بەڵام بێ بەربەست و قوربانی نەبووە، لە 20ی ئاداری 2008 هێزەکانی حکومەتی سووریا تەقەیان لە ئاهەنگێکی جەماوەری کرد لە قامیشلو و سێ گەنجیان شەهیدکرد، لە 20ی ئاداری 2015ش دوو چەکداری خۆکوژی داعش ئاهەنگێکی جەماوەرییان لە حەسەکە کردە ئامانج و خۆیان تێیدا تەقاندەوە، بەهۆیەوە زیاتر لە 50 هاونیشتمانی شەهید بوون و نزیکەی 100ی دیکەش بریندار بوون. ئێستاش لەلایەن گرووپە چەکدارەکانەوە ئاستەنگ بۆ ئاهەنگگێڕان بەبۆنەی نەورۆزەوە دروستکراوە.

 

دوای ئەوەی ساڵی 2010 نەتەوە یەکگرتووەکان، رۆژی 21ی ئاداری به‌ رۆژی جیهانیی جه‌ژنی نه‌ورۆز ناساند، یادکردنەوەی نەورۆز لە تورکیا، ئێران و سووریا کەمێک ئاسایی بووەوە، چونکە ئێستا ئەو وڵاتانەش لە هەوڵی ئەوەدان نەورۆز وەکو جەژنی نەتەوەیی خۆیان بناسێنن.

 

گەورەترین ئاهەنگ بۆ پێشوازیکردن لە یەکەمین رۆژی ساڵی کوردی، لە باکووری کوردستان سازدەکرێت، نەورۆزی یەک ملیۆنی لە ئامەد گەورەترین ئاهەنگی جەماوەرییە لە کوردستان.

 

لە باشووری کوردستانیش، بەهۆی شۆڕشەوە، بەردەوام رێگری لە ئاهەنگەکانی نەورۆز کراوە. لە بیستەکانی سەدەی رابردوودا، بۆ یەکەمجار ئاهەنگ و ئاگرکردنەوە کراوە بە سیمبولی نەورۆز و تێکەڵی پەیامی سیاسی کراوە.

 

عەبدوڵڵا ئاگرین، مامۆستای زانکۆ دەڵێت، "نەورۆز لەو سەردەم و لەو قۆناخەدا نیشانی خەبات و تێکۆشان بوو. قوتابیان، بەتایبەت قوتابیانی ئامادەیی لە سلێمانی، لە نەورۆزدا جلی کوردییان لەبەردەکرد و بە تێکۆشانیان دادەنا، بێگومان تێکۆشانیش بوو، چونکە رووبەڕووبوونەوەی ئەو هێزە شاراوەیە بوو کە دژی خواستەکانی میلـلەتی کورد بوو".

 

بەپێی رێکخراوی یونیسکۆ، زیاتر لە 300 ملیۆن کەس لە جیهاندا یادی نەورۆز دەکەنەوە، ئەو رێکخراوە لە ساڵی 2009دا جەژنی نەورۆزی خستە نێو لیستی کولتوورە فەرهەنگییە ناماددییەکان و زیاتر لە 11 نەتەوەش یادی دەکەنەوە.