بەهۆی جەژنەوە هاتووچۆی بازرگانی لە دوو دەروازەی هەرێمی کوردستان و ئێران رادەگیرێت

 

رۆژی هەینی 20ـی ئادار، دەروازەی نێودەوڵەتی پەروێزخان لە پارێزگای سلێمانی لە راگەیێندراوێکدا رایگەیاند: "بە بۆنەی جەژنی رەمەزانی پیرۆز و نەورۆزەوە، ئەمڕۆ و سبەی 20 و 21ـی ئادار، هاتووچۆی بازرگانی لە دەروازەکەمانەوە رادەگیرێت".

 

عەباس ئیسماعیل، سەرپەرشتیاری دەروازەی نێودەوڵەتیی پەروێزخان، ئەمڕۆ بە تۆڕی میدیایی رووداوی گوت: "تەنیا هاتووچۆی بازرگانی رادەگیرێت و هاتووچۆی گەشتیاری بەردەوام دەبێت".

 

لە راگەیێندراوەکەی دەروازەی پەروێزخان دا هاتووە، "یەکشەممە 22ـی ئادار، هاتووچۆی بازرگانی ئاسایی دەبێتەوە".

 

دەروازەی نێودەوڵەتیی باشماخیش لە پارێزگای سلێمانی لە راگەیێندراوێکدا رایگەیاندووە، "یەکەم رۆژی جەژنی رەمەزان بۆ ماوەی 24 کاژێر هاتووچۆی بازرگانی لە کۆمەڵگەی دەروازەی نێودەوڵەتی باشماخ رادەگیرێت".

 

بە گوێرەی راگەیێندراوی دەروازەکە بێت، هاتووچۆی گەشتیاری ئاسایی دەبێت. ئاماژە بەوەشکراوە، سبەی هاتووچۆی بازرگانی ئاسایی دەبێتەوە.

 

سیروان حوسێن، گوتەبێژی دەروازەی نێودەوڵەتیی حاجی ئۆمەران لە پارێزگای هەولێر، بە تۆڕی میدیایی رووداوی گوت: "ئەم جەژنە جیاواز لە رابردوو هاتووچۆی گەشتیاری و بارزگانی لە دەروازەکە راناگیرێت".

 

گوتەبێژی دەروازەی حاجی ئۆمەران گوتی: "لەگەڵ ئەوەی جەژنە و کەس هاتووچۆی بازرگانی ناکات، بەڵام دەروازەکە و سیستم کراوە دەبن و داناخرێن".

 

جگە لەو دەروازە نێودەوڵەتییانە، چەند دەروازەیەکی لاوەکی لەنێوان هەرێمی کوردستان لەگەڵ ئێران و رۆژهەڵاتی کوردستاندا هەن.