سەرۆک بارزانی: بە گیانلەدەستدانی سەرۆککۆمار و وەزیری دەرەوەی ئێران زۆر خەمگین بووم

لە پەیامێکدا ئەمڕۆ (دووشەممە، 20-5-2024) سەرۆک بارزانی رایگەیاند بە بیستنی هەواڵی گیانلەدەستدانی رەئیسی و ئەمیرعەبدوڵڵاهیان "لە رووداوی دڵتەزێنی کەوتنەخوارەوەی هیلیکۆپتەر، زۆر خەمگین بووم."

 

لە بەشێکی دیکەی پەیامەکەیدا سەرۆک بارزانی دەڵێ "پرسە و سەرەخۆشیی خۆم ئاراستەی رێبەری کۆماری ئیسلامی ئێران، حکومەت، خانەوادە و کەسوکاری قوربانیانی ئەو رووداوە دەکەم. خوای گەورە سەبووریی هەموو لایەک بدات."

 

20ـی ئایار بەرپرسانى کۆمارى ئیسلامیی ئێران گیانلەدەستدانى ئیبراهیم رەئیسى، سەرۆککۆمار و حوسێن ئەمیرعەبدوڵڵاهیان، وەزیرى دەرەوەى ئێران و حەوت سەرنشینى دیکەى ئەو هێلیکۆپتەرەیان راگەیاند، کە 19ـی ئایار تێکشکا.

 

هێلکۆپتەرەکەى سەرۆککۆمار لە کاتى گەڕانەوەیدا لە پارێزگاى ئازەربایجانى رۆژهەڵات بەرە و شارى تەورێز، تێکشکا و دواى زیاتر لە 16 کاژێر گەڕان دۆزرایەوە.