شارەوانیی سلێمانی: بەشێکی شەقامی 100 مەتری دەکرێتەوە

 

 

ئەمڕۆ سێشەممە 20ی 5ی 2025، زەردەشت رەفیق، گوتەبێژی بەڕێوەبەرایەتیی شارەوانیی سلێمانی بە تۆڕی میدیایی رووداوی راگەیاند، "ئەمساڵ بەشێکی سەرەکیی شەقامی 100 مەتری سلێمانی دەکرێتەوە و لە سەرەتای شەقامی تاسڵوجە تاوەکو نزیک گەڕەکی بەکرەجۆ دەگرێتەوە."

 

بە گوتەی زەردەشت رەفیق، کاتی تەواوبوونی پرۆژەکە مانگی 9ی 2026ـە. لەبارەی کردنەوەی ئەو بەشەی شەقامەکەش دەشڵێت: "بڕیارە سێ مانگی دیکە ئەو بەشە سەرەکییەی بکرێتەوە."

 

درێژیی رێگەی شەقامی 100 مەتریی سلێمانی 32 کیلۆمەترە. پڕۆژەکە حەوت یەکتربڕ، پێنج ئەندەرپاس، چوار پرد و فلای ئۆڤەرێک لەخۆ دەگرێت. لەیلا عومەر، سەرۆکی شارەوانیی سلێمانی رایگەیاند، "دیزاینی هەشت شەقامی دیکە ئامادەکراون کە بۆ فراوانکردنی پرۆژەکە و بەستنەوەی شەقامی 100 مەترییە بە سلێمانی."

 

لەبارەی دەستپێکردنەوەی نۆژەنکردنەوە و قیرتاوکردنی شەقامەکانی شاری سلێمانییەوە، گوتەبێژی بەڕێوەبەرایەتیی شارەوانیی سلێمانی گوتی: "نۆژەنکردنەوەی شەقامی تاسڵوجە و سەرداراوامان تەواو کردووە و ئێستا لە گەڕەکی راپەڕینین و بەپێی پرۆگرامی پرۆژەکانمان بەردەوام دەبین."

 

شەقامی 100 مەتریی سلێمانی کە بە ''ئۆتۆبانی بابان''یش ناسراوە، یەکێکە لە پڕۆژە ستراتیژییەکان. لە 11-7-2020 بەردی بناخەی دانرا، بە ‌چەند قۆناخێك جێبە‌جێ دە‌كرێت، گوژمەی پڕۆژەکە 400 ملیار دینارە و بڕیار بوو لە ‌ماوە‌ی 1100 رۆژ واتە تاوەکو 30-8-2023 تەواو بکرێت.

 

رۆژی 30ی نیسانی 2025، وەزیری دارایی هەرێمی کوردستان بڕیاری خەرجکردنی زیاتر لە 45 ملیار دیناری بۆ پارێزگاكانی سلێمانی و هەڵەبجە و ئیدارە سەربەخۆکانی گەرمیان و راپەڕین دا. لەو 45 ملیارە، نزیکەی  20 ملیار دینار وەکو شایستەی دارایی پڕۆژەی شەقامی 100 مەتریی سلێمانی دانرابوو.