لە هەولێر یەکەمین فێستیڤاڵی کورتەفیلمی ژینگەیی سازدەکرێت

 

رۆژی چوارشەممە، 20ـی ئایاری 2026، سیروان عوسمان، بەڕێوەبەری گشتیی رۆشنبیری و هونەری هەولێر بە تۆڕی میدیایی رووداوی راگەیاند: "بە هاوکاری پارێزگاری هەولێر و چەند کۆمپانیایەک، پشتیوانیی ئەم بیرۆکەیەمان کردووە کە هی دەرهێنەری کورد (پشتوان عەبدوڵڵا)یە و چەند بەرهەمێکی دەربارەی ژینگە ئامادەکردووە و لە رۆژانی 20 و 21ـی ئەم مانگەدا پەخش دەکرێن."

 

بەڕێوەبەری گشتیی رۆشنبیری و هونەری هەولێر ئاماژەی بەوەش کرد، چالاکییەکان تەنیا لە سینەما نامێننەوە، بەڵکو "رۆژی دوای فێستیڤاڵەکە، دەچنە ئیدارەی سەربەخۆی سۆران و وەک پشتگیرییەک بۆ سرووشتی کوردستان، کۆمەڵێک نەمام دەچێنن." 

 

فێستیڤاڵەکە لە کاژێر 6:00ـی ئێوارە دەستپێدەکات و کاژێرێک و  نیو بەردەوام دەبێت.

 

ئەو فێستیڤاڵە کە لەژێر دروشمی "مرۆڤ هەڵقوڵاوی ژینگەیەتی" لە سینەمای ئەمپایەر سازدەکرێت. لە فێستیڤاڵەکەدا 18 کورتەفیلمی جۆراوجۆر لە جۆرەکانی (فیکشن، دۆکیومێنتاری و پڕۆمۆ) نمایش دەکرێن. جگە لە نمایشەکان، تیمی فێستیڤاڵیش چەند فیلمێکی تایبەت بەو بۆنەیەوە بەرهەمدێنن. هەروەها دوو لیژنەی تایبەتمەندی هونەری، هەڵسەنگاندن بۆ بەرهەمەکان دەکەن و سێ خەڵاتی تایبەت بەسەر باشترین سێ کورتەفیلمدا دابەش دەکرێن.

 

ئامانجێکی دیکەی فێستیڤاڵەکە وەک لە راگەیێندراوی فێستیڤاڵەکەدا هاتووە، "نیشاندانی رووە گەش و جوانەکەی کوردستانە لە رێگەی ژینگە و پێکەوەژیانی پێکهاتە جیاوازەکانەوە، بۆ ئەوەی بیسەلمێنن کە شەڕ و ململانێکان ناتوانن ئیرادەی ژیان و جوانی لای مرۆڤی کورد لاواز بکەن.