بافڵ تاڵەبانی: دەکرێت هەڵەبجە ببێتە سەنتەری کشتوکاڵ و گەشتیاری لە عێراق

 

 

ئەمڕۆ دووشەممە 20ی تشرینی یەکەمی 2025 بافڵ تاڵەبانی، سەرۆکی یەکێتی گوتی، "کەی دەنگێکی باشمان هێنا و سەرکەوتوو بووین لەم هەڵبژاردنە، بەرنامەمان زۆرە بۆ هەڵەبجە و شارەزوور و هەورامان، ئەمجارە بە شێوازێکی زۆر جیاواز ئیش دەکەین."

 

بافڵ تاڵەبانی گوتیشی، "دەبێت پەیوەستبوونێکی زۆر کۆنکرێتی لەگەڵ بەغدا دروست بکەین، پارەیەکی زۆر لەوێ هەیە و دەبێت لێرە خەرج بکرێت. بۆ وەکو پێویست بزنس لە هەڵەبجە نییە و گەنجەکانمان دەچنە شارەکانی دیکە؟ لە هەڵەبجە زۆر مەجال هەیە بۆ ئیشکردن، ماڵە شەهیدەکانمان وەکو پێویست و وەکو ئەوانەی بەغدا خزمەت دەکرێن؟ ئەی ئەو هەموو بریندارانە کە ئێستاش نەوە لەدوای نەوەی نەخۆشی و کێشەی تەندروستییان هەیە لەبەر کیمیاباران."

 

سەرۆکی یەکێتی زیاتر قسەی کرد و گوتی، "راستە یەکێتی خەڵک [بریندارانی چەکی کیمیایی] دەنێرێتە دەرەوە بۆ چارەسەر، بەڵام بە تەنیا فریا ناکەوێت، واجبی بەغدایە خزمەتی هەڵەبجە بکات، خۆشبەختانە ئێمە لەبەر پەیوەندییەکان و توانا و هێزی یەکێتی دەتوانین ئەم شتانە دابین بکەین."

 

لە ئاهەنگەکەدا، بافڵ تاڵەبانی رووی لە بەربژێرەکان کرد و گوتی، "خوا وەکیلە وەکو پێویست خزمەتی خۆتان نەکەن، خۆتان دەزانن چی روودەدات!"

 

سەرۆکی یەکێتی لەبارەی هەڵەبجەوە زیاتر قسەی کرد و گوتی، "هەڵەبجە دەتوانێت ببێتە سەنتەری کشتوکاڵ و گەشتیاری لە عێراق، دەی بۆ نەیکەین؟ من دڵنیاتان دەکەمەوە بەربژێرەکانمان ئامانجیان ئەوە دەبێت و وەکو یەکێتی رێزتان لێ دەگرن."

 

گوتیشی، "دەبێ پارەی هەڵەبجە راستەوخۆ بۆ هەڵەبجە بێت، هیچ پێویست ناکات خزمەتی ئێرە بچێتە شوێنێکی دیکە و دواتر بینێرنەوە، حەق و حقووقی هەڵەبجە راستەوخۆ بۆ هەڵەبجەییەکانە."

 

لەبارەی حیزبەکەشیەوە گوتی، "بەم رووحییەتە، یەکێتی هەڵبژاردن لەدوای هەڵبژاردن بەرەو پێشەوە دەڕوات."