لە چوار پارێزگای رۆژهەڵاتی کوردستان بەهۆی سەرماوە پشووە

 

 

چەند رۆژێکە بارستە هەوایەکی سارد و شەپۆلێکی بەفربارین رووی لە رۆژهەڵاتی کوردستان کردووە.

 

بەڕێوەبەرایەتیی کۆنترۆڵی قەیرانی پارێزگای سنە رایگەیاند، رۆژی چوارشەممە (21ی کانوونی دووەمی 2026) بەهۆی دابەزینی پلەی گەرما و بە مەبەستی کەمکردنەوەی بەکارهێنانی سووتەمەنی، سەرجەم دامەزراوە حکومییەکان، بانکەکان، قوتابخانە و زانکۆکان دادەخرێن.

 

بەپێی راگەیێنداوەکە، بڕیارەکە دامەزراوە فریاگوزارییەکان، فریاکەوتنی خێرا و بنکە تەندرووستییەکان ناگرێتەوە.

 

کۆنترۆڵی قەیرانی پارێزگای ورمێش بڕیاریدا رۆژی چوارشەممە سەرجەم قوتابخانە، زانکۆ و پەیمانگە و دامەزراوە حکومیەکان و بانکەکان دابخرێن، ئەوەش بە مەبەستی کەم بەکارهێنانی گاز و وزە.

 

لە پارێزگای کرماشانیش، بە مەبەستی کەم بەکارهێنانی گاز و وزە، لە پەیمانگە و قوتابخانەکان دەبێتە پشوو و لە دامەزراوە حکومیەکان و بانکەکانیش دوو کاژێر درەنگتر دەست بە کارکردن دەکرێت.

 

هەر بەهۆی سەرما و دابەزینی پلەی گەرماوە کۆنترۆڵی قەیرانی پارێزگای ئیلام بڕیاریدا رۆژی چوارشەممە قوتابخانە، زانکۆ و پەیمانگەکان بکرێنە پشوو و دەوام لە دامەزراوە حکومییەکان و بانکەکان دوو کاژێر درەنگتر دەست پێبکات.

 

تاوەکو ئێستا پارێزگای لوڕستان هیچ بڕیارێکی لەبارەی پشوو نەداوە.