وەزیری خوێندنی باڵا: فێربوونی زمانی دووەم گرنگە، بەڵام نابێت زمانی یەکەم لەبیر بکرێت

 

ئەمڕۆ رۆژی جیهانیی زمانی دایکە، د. ئارام محەممەد، وەزیری خوێندنی باڵا بەو بۆنەیەوە پەیامێکی بڵاوکردەوە، "ئەگەرچی بڕوای تەواومان بەو راستییەیە کە فێربوونی زمانی دووەم کۆڵەکەیەکی گرنگی پڕۆسەی خوێندنە و هۆکاری هاوبەشکردنی بەرهەمی مەعریفە و تێکەڵبوونی کولتوورییە، بەڵام فێربوونی زمانی دووەم نابێت لەسەر حسابی فەرامۆشکردنی زمانی دایک بێت."

 

بەگوێرەی لێکۆڵینەوەیەکی زانکۆی نیشتمانیی ئوسترالیا، حەوت هەزار زمان و شێوەزار لە سەرانسەری جیهاندا قسەیان پێدەکرێت و، 1500 زمان و شێوەزار لە سەرانسەری جیهان مەترسیی ئەوەیان لەسەرە تاوەکو کۆتایی ئەم سەدەیە لەنێوبچن.

 

وەزیری خوێندنی باڵا لە پەیامەکەیدا رایگەیاند، "پەرەپێدانی زمانی دایک ئەرکێکی نەتەوەیی و نیشتیمانی و مۆڕاڵی و زانستییە و فاکتەری بنچینەیی پاراستنی ناسنامەی نەتەوەییمانە. وەک وەزارەتی خوێندنی باڵا و توێژینەوەی زانستی تێڕوانین و پلانی درێژخایەنمان هەیە بۆ پەرەپێدانی زیاتری زمانی کوردی، جێگەی خۆشحاڵییە کە ئێستا بەشەکانی زمان و ئەدەبی کوردی لە زانکۆکانی هەرێمی کوردستان لە رووی مەعریفی و توانای مرۆییەوە لە ئاستێکی بەرزدان".

 

هەروەها لەبارەی زمانی کوردیشەوە وەزیری خوێندنی باڵا دەڵێت، "زمانی شیرینی کوردی، لە رووی مێژوویی و قووڵایی پێکهاتە بنچینەییەکانی زمان، بە یەکێک لە زمانە هەرە دەوڵەمەندەکانی مێژووی مرۆڤایەتی ئەژمار دەکرێت، بڕوامان وایە کە زمانی دایک رۆڵی سەرەکی دەبینێت لە گەشەکردنی هزری و سایکۆلۆجی و بنیادنانی کەسایەتی تاکەکانی کۆمەڵگە و بنەمای سەرەکیی پڕۆسەی خوێندن و فێربوونە".