ئاری هەرسین: نزیکبوونەوەی یەکێتی و نەوەی نوێ لە ئەفلام کارتۆن دەچێت

 

 

ئاری هەرسین، بەرپرسی لقی چواری پارتی لە سلێمانی، سەبارەت بە کۆبوونەوەکانی ئەم دواییەی نێوان یەکێتی و نەوەی نوێ گوتی: "ئەم دانیشتن و قسانەی دەیکەن زیاتر لە ئەفلام کارتۆن دەچێت، مەبەستم تەشهیر نییە، بەڵام نێوانیان زەوی و ئاسمانی فەرقە و وەک ئەوە وایە بە سیحرێک پێکەوە دانیشتبن."

 

ئاری هەرسین گوتی، بیرکردنەوە لە حوکمڕانی لە هەرێمی کوردستان بەبێ پارتی "وەهمە" و دەڵێت: "پارتی گەورەترین حیزبی کوردستان و عێراقە، حزووری مێژوویی هەیە و لەسەر ئاستی نێودەوڵەتی و ناوچەیی حیسابی بۆ دەکرێ. هەر لایەنێک پێیوایە بێ پارتی دەتوانێت حکومەت پێکبهێنێت، فەرموون با بچن تاقی بکەنەوە، بەڵام دڵنیام ناتوانن."

 

لەبارەی پێگەی یەکێتی، ئاری هەرسین پێیوایە نابێت یەکێتی سەنگی خۆی بە بوونی خەڵکی دیکە (نەوەی نوێ) پێناسە بکات و گوتەیەکی ساڵانی پێشووی مەلا بەختیار وەبیردەهێنێتەوە کە گوتبووی "یەک کورسیمان هەبێت یان سەد کورسی، ئێمە هەر یەکێتین".

 

لە بەشێکی دیکەی قسەکانیدا، ئاری هەرسین گوتی: "ئەگەر کاک شاسوار واقیعی هەرێمی کوردستان و ئەو ئاستەنگە دەرەکییانەی نەخوێندبێتەوە کە رووبەڕووی حوکمڕانی دەبنەوە، ئەوە کارەساتە، چونکە حوکمڕانی بە قسەی راگەیاندن و بەبێ خوێندنەوەی واقیع ناکرێت."

 

بەرپرسی لقی چواری پارتی هۆشداری لە دابەشبوونی هەرێمی کوردستان دەدات، ئەگەر بێتو لایەنەکان بیر لە پێکهێنانی حکومەت بێ حیزبەکەی بکەنەوە و دەڵێت: "ئەگەر ئەوان بیانەوێت لەم دۆخەدا بە تەنیا حکومەت پێکبهێنن، ئەوا دۆخەکە لە دوو ئیدارەییش دەردەچێت و دەبێتە دوو هەرێم. ئەگەر ئەوە رووبدات، ئێرانییەکان گوتەنی 'واوەیلا بە حاڵیان'، چونکە ئەوان دەبنە هۆکاری لەدەستدانی ئەم نیعمەتە و بەرپرسیارێتییەکی گەورەی مێژوویی و ئەخلاقی و نیشتمانی هەڵدەگرن."