بەهۆی راگرتنی حەواڵەی دۆلار لەلایەن بەغداوە، وەزارەتی دارایی و ئابووریی هەرێمی کوردستان بۆ رێگریکردن لە گرانبوونی نرخی خۆراک و وەستانی جووڵەی بازرگانی، بڕیاریدا بەشێوەیەکی کاتی رێگە بە بازرگانان بدات لە رێگەی دەروازە سنوورییەکانەوە حەواڵەی دۆلار بە "نەختینە" بکەن
سەرۆکی فراکسیۆنی رەوتی هەڵوێست لە پەرلەمانی عێراق ئاشکرای دەکات، بەغدا مەرجەکانی هەرێمی کوردستانی بۆ جێبەجێکردنی سیستەمی ئەلیکترۆنیی (ئەسیکۆدا) لە دەروازە سنوورییەکان قبووڵە. هاوکات رایدەگەیێنێت، محەممەد شیاع سوودانی داوای دەستپێکردنەوەی هەناردەی نەوتی کردووە لە رێگەی هەرێمی کوردستانەوە، بەڵام تاوەکو ئێستا وەڵامی هەرێمی کوردستان ئەرێنی نەبووە.
تۆڕی میدیایی رووداو نێوەڕۆکی نامەیەکی مەسرور بارزانی، سەرۆکوەزیرانی هەرێمی کوردستان بۆ محەممەد شیاع سوودانی، سەرۆکوەزیرانی عێراق ئاشکرا دەکات، تێیدا نەخشەڕێگەیەک بۆ چارەسەری کێشەی گومرگ و کێشەی بازرگانانی کورد دەخاتەڕوو؛ هاوکات هەولێر وەڵامی داواکارییەکی بەغدا لەبارەی نەوت دەداتەوە.
سەرۆکی لیژنەی ئاسایش و بەرگری لە ئەنجوومەنی پارێزگای نەینەوا رایدەگەیێنێت، رێکارە ئەمنییەکان لە دەشتی نەینەوا تووند کراون و هێزێکی زۆری سوپا بڵاوەی پێکراوە، بەمەش بەڕێژەی 90٪ـی هێرشەکانی سەر هەرێمی کوردستان کەم دەبنەوە. ئاشکراشی دەکات کە سەرۆکوەزیرانی عێراق ژمارەیەک بەرپرسی هەواڵگریی لە کارەکانیان دوورخستووەتەوە.
بەهۆی کەمبوونەوەی کاژێرەکانی پێدانی کارەبای نیشتمانی، لە ئێوارەی ئەمڕۆوە موەلیدە ئەهلییەکان لە هەولێر و سلێمانی دەست بە کارکردن دەکەنەوە. لە هەولێر نرخی هەر ئەمپێرێک بە 5 هەزار دینار دیاریکراوە و لە سلێمانیش کارکردنی موەلیدەکان لە دوو کاتی جیاوازدا دەبێت.
راوێژکاری یاسایی وەزارەتی ناوخۆ و سەرۆکی تیمی دانوستاندنکاری هەرێمی کوردستان بۆ پرسی دەروازە سنوورییەکان رایدەگەیێنێت، کێشەی دەروازەکان و گومرگ لەگەڵ بەغدا کێشەیەکی تەکنیکی نییە، بەڵکو ناکۆکییەکی دەستوورییە و عێراق دەیەوێت بە عەقڵیەتێکی ناوەندی دەست بەسەر دەروازەکاندا بگرێت. دەشڵێت: "سیستمی ئەسیکۆدا کۆنە و لە بنەڕەتدا بۆ وڵاتە هەژارەکان دروستکراوە."
ئەندامێکی سەرکردایەتیی یەکێتیی نیشتمانیی کوردستان هۆشداریی لەبارەی دۆخی ناوچەکێشەلەسەرەکان و پرسی سەرژمێری دەدات و رایدەگەیێنێت، حکومەتی عێراق دەیان ملیار دیناری تایبەت بە ماددەی 140ـی بۆ خەڵکی خوارووی عێراق خەرجکردووە. هاوکات ئاشکرای دەکات، بەهۆی پەرتەوازەیی ماڵی کوردەوە، دەستکاریی داتاکانی سەرژمێری کراوە بۆ ئەوەی پشکی هەرێمی کوردستان لە بودجەدا کەمبکرێتەوە.
بەرپرسی لقی چواری پارتی دیموکراتی کوردستان دەڵێت، هەوڵەکانی یەکێتیی نیشتمانیی کوردستان و جووڵانەوەی نەوەی نوێ بۆ پێکهێنانی حکومەت بەبێ پارتی "وەهمە" و هاوپەیمانییەکەیان بە "ئەفلام کارتۆن" دەچووێنێت؛ هۆشداریش دەداتە ئەو دوو لایەنە کە هەر هەنگاوێک بەو ئاراستەیە، هەرێمی کوردستان بەرەو دوو ئیدارەیی و تەنانەت "دوو هەرێم" دەبات.
راوێژکارێکی سەرۆکی یەکێتی دەڵێت، بەستەڵەکی نێوان یەکێتی و پارتی تواوەتەوە و گفتوگۆکان پێشوەچوونی باشیان بەخۆوە بینیوە. ئاشکراشی دەکات یەکێتی بە نوێنەرایەتیی هاوپەیمانەکانی، لەنێویاندا جووڵانەوەی نەوەی نوێ، دانوستاندن لەگەڵ پارتی دەکات.
ئەندامێکی جڤاتی نیشتمانیی بزووتنەوەی گۆڕان دەڵێ، دوای بەستنی کۆنفرانس لە کەرکووک، کۆتایی بە کێشە یاساییەکانی بزووتنەوەکە هاتووە و ئێستا خاوەنی سەرکردایەتییەکی نوێن؛ ئاماژە بەوەش دەکات: "گەڕانەوەمان بۆ گردی زەرگەتە بە ئەگەرێکی دوور دەبینم".
