لە هەرێمی کوردستان شیری گوێدرێژ خواستی زۆری لەسەرە و بە ئەستەم دەستدەکەوێت

 

شاکر مەحموود ماوەی سێ ساڵە لە پارێزگای سەڵاحەدینەوە چووەتە دەشتەکانی شارەزوور بۆئەوەی شوانی بکات، ئێستاش مەیلی بۆ دۆشین هەیە و گوێدرێژەکەش بەرەنگاری دەکات.

 

شاکر مەحموود، شوانە و دەڵێت، "هەفتانە چەند کەسێک دێنە لامان داوای شیری گوێدرێژ دەکەن، دەڵێن بۆ چارەسەر دەمانەوێت، بەڵام هەفتەی یەک جار دەیدۆشین و بەبێ بەرامبەر پێیاندەدەم."

 

هاونیشتمانییەکی تەمەن 62 ساڵ کە نایەوێت بناسرێتەوە، هۆکاری خواردنی شیری گوێدرێژ دەخاتەڕوو، ئەو دوو هاوژین و 15 منداڵ و 9 نەوەی هەیە و دەڵێت، "لەهەر شوێنێک بزانم ناسیاوێک یان دۆستێکم گوێدرێژ و مایینی هەیە و زاوە، ئەوا دەچم بۆلای و داوای شیری لێدەکەم، هەرخۆم دەیدۆشم و لەوێ دەیخۆمەوە. لەڕووی توانای سێکسی و بەرگری لەشەوە زۆر باشە. لەساڵی 1985ـەوە لەهەرکوێ دەستمبکەوێت دەیخۆمەوە."

 

نیگا شەفیق، پسپۆڕی خۆراک و نەخۆشییەکانی منداڵان بە تۆڕی میدیایی رووداوی گوت، "دەگوترێت ئەو جوانییەی کیلۆپاترا هەیبووە بەهۆی خۆشۆردنییەوە بووە بە شیری گوێدرێژ، بەڵام ئەوەی لە زانستی نوێدا لەسەری دەگوترێت، ئەوەیە کە زۆر باش و تەندرووستە، دەتوانرێت بۆ چارەسەری هەندێک نەخۆشی وەک هەوکردنی پێست و جومگەکان و سی، هەروەها کۆکە و هەڵامەت بەکاربهێنرێت."

 

لە مەیدانی ئاژەڵانی سلێمانی، وەک ھەر ئاژەڵێکی دیکە کڕین و فرۆشتن بە گوێدرێژەوە دەکرێت، بەڵام شیرەکەی بە ئاسانی دەستناکەوێت، چونکە هەم ماکەر بەرامبەر کەر ژمارەیان کەمترە و هەم شیریان کەمە.

 

لە مەیدانی ئاژەڵانی سلێمانی نرخی لیترێک شیر جیاوازە و بەپێی خاوەن گوێدرێژەکە دەگۆڕێت، نرخەکەی لە 60 هەزار دینارەوە دەستپێدەکات تاوەکو 200 هەزار دینار، لەلایەکی دیکەوە هەندێک خاوەن گوێدرێژ بێبەرامبەر دەیبەخشن.

 

حاجی جەمال، هاونیشتانییەکی خەڵکی سلێمانییە و ساڵانێکە کاری کڕین و فرۆشتن بە گوێدرێژەوە دەکات، دەستی لەسەر گوێدرێژە بۆرەکەی داناوە و دەڵێت، ئەو کەسانەی داوای شیری گوێدرێژ دەکەن تەمەنیان سەروو 35 ساڵە و مانگانە نزیکی چوار کەس داوایدەکات.

 

حاجی جەمال، بەخێوکەری گوێدرێژ گوتی، "خەڵک زۆر دێت بۆلام داوای شیری گوێدرێژم لێ دەکەن، دەڵێن بۆ هەناسەتەنگی و جوانکاری بەکاریدێنن، بەڵام ئەم گوێدرێژە لەوانەیە نیو کیلۆ شیری تێدابێت و نرخی 150 تاوەکو 200 هەزار دیناربێت."

 

باوترین بەکارهێنانی شیری گوێدرێژ لە پیشەسازی جوانکاریدایە کە دەکرێتە سابوون و شامپۆ و کرێم، بەڵام هێشتا هەرێمی کوردستان نەگەیشتووە بەو پیشەسازییە.