زیانەکانی لافاوەکەی رانیە: زیاتر لە 25 ماڵ ژێر ئاو کەوتوون و لیژنە بۆ قەرەبوو پێکدەهێنرێت

 

عەبدولڕەحمان ساڵح، دانیشتوویەکی رانیەیە و دەڵێت: "هیچمان بۆ دەرنەچووە؛ نان، برنج و نوێنەکانمان هەمووی تەڕ بووە. ئیشی من کارتۆن کۆکردنەوەیە."

 

تەرزە و لافاوەکە تەنیا زیانی بە ناوماڵەکان نەگەیاندووە، بەڵکو سرووشتی ناوچەکەشی گرتووەتەوە؛ هێز و قەبارەی تەرزەکە هێندە زۆر بووە، گەڵا و گوڵی درەختەکانی تەکاندووە.

حاجی حەمەساڵح، دانیشتوویەکی دیکەی رانیەیە و دەڵێت: "هەنگی زۆر و مێوم هەبوو، تەرزەکە هەمووی کوتاوە و هیچی پێوە نەماوە."

 

هاوکات لەگەڵ تەرزە و بارانەکەدا، رەشەبایەکی بەهێز رانیەی گرتەوە و بەهۆیەوە هەردوو منارەی مزگەوتی جافان رووخان، کە بەرزیی هەر یەکێکیان 15 مەتر بوو.

 

بە مەبەستی دیاریکردنی قەبارەی وردی زیانەکان، ئیدارەی ناوچەکە لیژنەی تایبەتی پێکهێناوە. بەگوێرەی ئامارە سەرەتاییەکانی بەڕێوەبەرایەتیی بەرگریی شارستانیی راپەڕین، لافاو چووەتە نێو زیاتر لە 25 ماڵ و زیانی پێگەیاندوون.

 

حوسێن مەحموود، قایمقامی رانیە رایگەیاند: "لیژنەمان راسپاردووە بۆ خەمڵاندنی زیانەکان و قەرەبووکردنەوەی خەڵکەکە؛ ئێمە بەردەوام لەگەڵیانین."

 

زیانەکانی تەرزە و لافاو تەنیا لە کەلوپەلی ناوماڵ و ژینگەی ناوچەکەدا نەوەستاون، بەپێی ئامارەکانی تەندروستیی راپەڕین، 35 هاونیشتمانی بەهۆی لافاو و تەرزەکەوە بریندار بوون، کە دوای وەرگرتنی چارەسەری پێویست، زۆربەیان رەوانەی ماڵەوە کراونەتەوە.