لە بەردەم دادگەی هەولێر دوو بنەماڵەی تەقە لە یەکدی دەکەن
رووداو دیجیتاڵ
لەبەردەم باڵەخانەی دادگەی تێهەڵچوونەوەی هەولێر، پێکدادان و تەقە لەنێوان دوو بنەماڵەدا دروستبوو. پۆلیس دەستبەجێ گەیشتە شوێنی رووداوەکە و تەقەکەرەکانی دەستگیر کرد.
رەنجە جەمال، پەیامنێری رووداو لە هەولێر رایگەیاند، نیوەڕۆی ئەمڕۆ سێشەممە، کاژێر 12:30، لە شەقامی نێوان دادگەی تێهەڵچوونەوەی هەولێر و سەندیکای پارێزەران، دوو بنەماڵە دوای هاتنە دەرەوەیان لە هۆڵەکانی دادگە، بووەتە دەمەقاڵێیان و دواتر تەقەیان بەسەر یەکدیدا کردووە.
بەپێی زانیارییەکانی رووداو، ئەو دوو بنەماڵەیە لەنێو دادگەدا دۆسیەیەکی کوشتنیان لە دادگەی تاوانەکان هەبووە، دوای تەواوبوونی دانیشتنی دادگە و لە کاتی هاتنە دەرەوەیان، کێشەکە لەنێوانیاندا سەریهەڵداوەتەوە و بە چەکی جۆری کڵاشینکۆف و دەمانچە تەقەی هەواییان کردووە.