چیرۆکی ئەو منداڵانەی لەلایەن دایکیانەوە ئەشکەنجە دەدران
رووداو دیجیتاڵ
بینینی لێدانی دایكێک لە دوو منداڵە شیرەخۆرەکەی کەم کەس بەرگەی دەگرێت، دایکی منداڵەکان جگە لە لێدانی منداڵەکانی بەدەستی خۆشی ڤیدیۆی ئەشکەنجەدانی جگەرگۆشەکانی تۆماردەکات.
واحیدی 7 ساڵان لە رووخسار و جلوبەرگی زەحمەتی ژیان و لە چاوەکانی ترس تاکە شت بوو کە هەستت پێدەکرد. واحید یەکێکە لە منداڵەکانی ئەو ژنەی کە ئەشکەنجەی دوو منداڵەکەی داوە. ئەو بەم تەمەنە منداڵەیەوە بێبەش لە خوێندن و رۆژ تاوەکو ئێوارە لە عەلوەی هەولێر سندووق کۆدەکاتەوە و 10 هەزار رۆژانە بۆ خێزانەکەی دێنێتەوە.
گفتوگۆی نێوان پەیام سەربەست، پەیامنێری رووداو و واحید، منداڵی ئەو ژنەی دەستگیرکراوە:
واحید: ئەو دەگەڕایەوە لێیدەداین
پەیامنێری رووداو: کێ؟
واحید: سەباح
پەیامنێری رووداو: لەکێی دەدا؟
واحید: لە دایکم
پەیامنێری رووداو: بەچی لێی دەدا؟
واحید: بەدەست
پەیامنێری رووداو: لە ئێوەشی دەدا؟
واحید: بەڵێ
پەیامنێری رووداو: باوکت لێی دەدای؟
واحید: بەڵێ
پەیامنێری رووداو: ئەی دایکت؟
واحید: ئەویش لێی دەدام
پەیامنێری رووداو: کێ لە ماڵەوە کاردەکات تەنیا تۆ یان خوشک و براکانیشت؟
واحید: خوشکەکانم و من
پەیامنێری رووداو: خوشکەکانت چ کارێک دەکەن؟
واحید: ئاودەفرۆشن لە شەقام
پەیامنێری رووداو: واحید دەتەوێ چیت بۆ بکەین؟
واحید: دایکمم دەوێ
لە دوای بەدواداچوون پەیامنێری رووداو ئەمەی لە چیرۆکی ئەو خێزانە دەستکەوتووە. خەڵکی موسڵن و لە هەولێر دەژین، دایکی منداڵەکان لەدایکبووی 1974ـە، هاوژینی پێشووی نزیک 6 ساڵ پێش ئێستا بە نەخۆشی کۆچی دواییکردووە و 6 منداڵیان هەبووە 4 کچ و دوو کوڕ کە گەورەترینیان 12 ساڵە و بچووکترینیان 4 ساڵە.
دایکی منداڵەکان ساڵی 2017 ژیانی هاوژینی لەگەڵ هاووڵاتییەکی عەرەب پێکدەهێنێت کە جگە لە ئەو دوو هاوژینی دیکەی هەیە و دەبنە خاوەنی دوو منداڵ و لە گرتە ڤیدیۆیەکەدا دیارە کە لێیان دەدات.
سەفین تاهیر، بەڕێوەبەری بەرەنگاربوونەوەی تووندوتیژیی دژی ئافرەتان و خێزان ئاماژەی بەوە کرد: کۆمەڵێک منداڵی هەبووە بەس ئەو توندووتیژیەی ئەنجامی داوە زۆربەی بەرامبەر ئەو دوو منداڵە بچووکە بووە. بە قسەی خۆی دەڵێ، چونکە پیاوەکەی بەجێیهێشتووە و ماوەیەکی زۆرە لێی دوورە بۆیە ئەم شتەی کردووە بۆئەوەی ئازاری باوکی منداڵەکان بدات.
لەگەڵ بڵاوبوونەوەی گرتە ڤیدیۆکە، دایکەکە دەستگیردەکرێت و دوو منداڵە ئەشکەنجەدراوەکەشی لەگەڵی لە زیندانن. باوکیان فەرمانی دەستگیرکردنی بۆ دەرچووە و 6 منداڵەکەی دیکەش بە بڕیاری دادوەر بردرانە خانەی بێسەرپەرشتان.