دوو منداڵ لە سنووری مێرگەسۆر لە دوو رووداوی جیادا گیانیان لەدەستدا

 

 

 

ئەمڕۆ پێنجشەممە، 21ـی ئابی 2025، رەوەند مەغدید، گوتەبێژی بەرگریی شارستانیی سۆران بە رووداوی راگەیاند، دوای 8:00 کاژێر لە گیانلەدەستدانی ئەو منداڵەی کەوتە بەر زنجیری شۆفل، لە رووداوێکی دیکەدا منداڵێکی تەمەن 9 ساڵان بە ناوی دەرفەت رێبوار سەعید لە رووباری بلێ لە دەڤەری بارزان خنکا.

 

گوتیشی دوای کاژێرێک لە خنکانی منداڵەکە، تەرمەکەی لەلایەن تیمەکانیانەوە دۆزراوەتەوە و رەوانەی دادپزیشکیی سۆران کراوە. 

 

ئەمە نۆیەمین کەسە لەم ساڵدا لە رووبارەکانی سنوورەکە بخنکێت و جگە لە تەرمی ئاڤێستا یوسف کە تاوەکو ئێستا نەدۆزراوەتەوە، هەموو ئەوانەی دیکە دوای خنکانیان بە ماوەیەکی کەم تەرمەکانیان دۆزراونەتەوە.