مەسرور بارزانی: یەکێتیی زانایان رۆڵێکی گرنگی لە بەرەنگاربوونەوەی تووندڕۆیی هەیە

 

 

مەسرور بارزانی، سەرۆکی حکومەتی هەرێمی کوردستان لە پەیامەکەیدا کە ئەمڕۆ 21ی ئەیلوولی 2025 ئاراستەی سەرۆک و ئەندامانی مەکتەبی جێبەجێکردن و سەرجەم زانایانی کردووە، رایگەیاند، "بە رێز و پێزانینەوە لە رۆڵی گرنگی یەکێتیی زانایانی ئایینیی ئیسلامیی کوردستان و زانایانی ئایینی بەگشتی دەڕوانین."

 

سەرۆکی حکومەت جەختی لەسەر رۆڵی یەکێتییەکە کردەوە لە "قووڵکردنەوەی بنەما و بەها بەرز و مرۆییەکانی ئایینی ئیسلام و بەرەنگاربوونەوەی هزری تووندڕۆیی." هەروەها ئاماژەی بە هەوڵەکانیان کرد بۆ "بەهێزترکردنی میانڕەوی و کولتووری بەیەکەوەژیانی ئاشتییانەی نێوان پێکهاتە جیاوازەکانی کوردستان."

 

یەکێتیی زانایانی ئایینی ئیسلامیی کوردستان لە ساڵی 1970 دامەزراوە و بە یەکێک لە رێکخراوە ئایینییە کاریگەرەکانی هەرێمی کوردستان دادەنرێت، کە کار لەسەر رێنوێنیی ئایینی و پتەوکردنی بنەما کۆمەڵایەتییەکان دەکات.