وەزارەتی پەروەردە: نابێ پشووی قوتابخانەکان بۆ هەڵبژاردن هێندە زۆربێ کاریگەریی بکاتەسەر خوێندن

 

نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکانی عێراق، ئەمڕۆ بە تۆڕی میدیایی رووداوی گوت: "لەگەڵ وەزارەتی پەروەردەی هەرێمی کوردستان لە گفتوگۆداین بۆ دیاریکردنی پشووی قوتابخانەکان بەهۆی بەڕێوەچوونی هەڵبژاردنەوە".

 

لە عێراق پشوو راگەیێندراوە لە 05ـی مانگی 11 بۆ 13ـی هەمان مانگ. نەبەرد عومەر دەڵێ: "وەزارەتی پەروەردە داوا دەکات کاتەکە کەمبکرێتەوە بەراورد بە عێراق و دەڵێن زۆرە، لەبەر ئەوەی تاقیکردنەوەکانی نیوەی ساڵیان لەپێشە".

 

بەرپرسی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق ئاماژەی بەوەکرد: "ئێمە پێویستمان بە کاتە بۆ ئەوەی ئامێرەکانی دەنگدان و کەرەستە ئەلیکترۆنییەکان بگەیێنینە شوێنەکانی دەنگدان، ئەوەش روونە کە دەنگدانی تایبەت 09ـی مانگ دەستپێدەکات و 11ـی مانگیش دەنگدانی گشتی، پێم وایە بۆ ئێمە پێویستە 6 بۆ 7 رۆژ پشوو دیاری بکرێت".

 

نەبەرد عومەر دەڵێ: "دەمانەوێ رەچاوی دۆخی پەروەردە بکەین و هاوکار دەبین لەگەڵ وەزارەتی پەروەردە".

 

سامان سیوەیلی، گوتەبێژی وەزارەتی پەروەردەی هەرێمی کوردستان، ئەمڕۆ سێشەممە بە تۆڕی میدیایی رووداوی گوت: "تاوەکو ئەمڕۆ هیچ بڕیارێکمان نەداوە لەسەر داواکەی کۆمیسیۆن بۆ رۆژە پشووەکان. لە رۆژانی داهاتوودا وەڵامیان دەدرێتەوە".

 

سامان سیوەیلی گوتی: "لە وەڵامێکی فەرمیی کۆمیسیۆندا بڕیار دەدەین، کە رۆژەکانی پشوو چەند دەبن، کێ دەگرێتەوە و کێ ناگرێتەوە. پرۆسەی نیشتمانی کە هەڵبژاردنە گرنگە و پرۆسەی خوێندنیش گرنگە و نابێ کاریگەریی خراپی بکرێتەسەر".

 

گوتەبێژی وەزارەتی پەروەردە گوتی، لە رۆژانی داهاتوودا کۆبوونەوەیەک لەسەر ئاستی باڵای وەزارەتەکە دەکرێ و وەزیر بڕیاری رۆژەکانی پشوو دیاری دەکات.

 

بڕیارە 11-11-2025، هەڵبژاردنی پەرلەمانی عێراق لە هەرێمی کوردستان و عێراق بەڕێوەبچێ.