لە عەلوەی سلێمانی گەنجێک لەلایەن هاوڕێیەکییەوە کوژرا

 

سەرکەوت ئەحمەد، گوتەبێژی پۆلیسی سلێمانی ئەمڕۆ هەینی بە تۆڕی میدیایی رووداوی گوت: "نازانین لەسەر چی بووە بە شەڕیان و یەکێکیان ئەوی دیکەی بە دەڕنەفیز کوشتووە".

 

بەگوتەی سەرکەوت ئەحمەد، کوژراوەکە سەرەتا بە سەختی بریندار کراوە، تاوەکو گەیێندراوەتە فریاکەوتن گیانی لەدەستداوە.

 

رووداوەکە نزیک کاژێر 04:00ـی بەرەبەیانی ئەمڕۆ هەینی لە عەلوەی هوانە لە شاری سلێمانی روویداوە. گوتەبێژی پۆلیس گوتی: "بکوژ ناسراوەتەوە، بەڵام هێشتا دەستگیر نەکراوە".

 

سەروەر عەلی، بەرپرسی سەندیکای عەلوەی سلێمانی بە تۆڕی میدیایی رووداوی گوت: "هەردوو کەسەکە کە بووە بە شەڕیان شۆفێرن و خەڵکی کەلارن، بەڵام رووداوەکە لە عەلوەی هوانە بووە لە سلێمانی".

 

ئەو کەسەی کوژراوە ناوی هێرش محەممەد کەریمە، دانیشتووی شاری کەلارە و لە بیستەکانی تەمەنیدایە؛ ئەمڕۆ لە شاری کەلار پرسەی بۆ دادەنرێت.

 

پۆلیسی سلێمانی پەڕاوی لێکۆڵینەوەی بۆ رووداوەکە کردووەتەوە.