ئاسایشی سلێمانی وردەکاریی رووداوی عەلوەکە ئاشکرا دەکات؛ 'بکوژیش دەستگیرکرا'

 

 

بەپێی راگەیێندراوی بەڕێوەبەرایەتیی ئاسایشی پارێزگای سلێمانی، بکوژی رووداوەکەی شەوی رابردووی عەلوەی سلێمانی دەستگیر کراوە.

 

لە راگەیێندراوەکەدا وردەکاریی رووداوەکە بەم شێوەیە خراوەتەڕوو، "شەوی 20-11-2025 دوای دروستبوونی کێشە و دەمەقاڵێ لەنێوان دوو شۆفێری بارهەڵگر لە رێگەی نێوان کەلار - سلێمانی و بە گەیشتنیان بە عەلوەی سلێمانی، دووبارە گرژی دەکەوێتە نێوانیان، یەکێک لە شۆفێرەکان بە (دەڕنەفیز) هێرش دەکاتە سەر شۆفێری بەرامبەری و بە سەختی برینداری دەکات. دوای گەیاندنی بە نەخۆشخانە، بەهۆی سەختیی برینەکەیەوە گیانی لەدەستدا."

 

بەڕێوەبەرایەتیی ئاسایشی پارێزگای سلێمانی دەڵێت، دوای رووداوەکە دەستبەجێ لێکۆڵینەوە و بەدواداچوونیان دەستپێکرد، تۆمەتباری رووداوەکە خۆی رادەستی بەڕێوەبەرایەرتییەکەیان کردووە.

 

ئێستا تۆمەتبار بە بڕیاری دادوەری لێکۆڵینەوەی ئاسایش، بە ماددەی 406 لە یاسای سزادان راگیراوە و لێکۆڵینەوە لە دۆسیەکەی بەردەوامە، ئەمەش وەکو لە راگەیێندراوی ئاسایشی سلێمانی دا ئاماژەی پێکراوە.