ئومێد خۆشناو: لە ئەمڕۆوە لە بەردەم پارکی شانەدەر هاوکاری بۆ رۆژئاوای کوردستان کۆدەکەینەوە

ئومێد خۆشناو، پارێزگاری هەولێر، ئەمڕۆ پێنجشەممە بە تۆڕی میدیایی رووداوی گوت: "نیوەڕۆی ئەمڕۆ گەورەترین کەمپینی کۆکردنەوەی کۆمەک و هاوکاری بۆ خوشک و برایانمان لە رۆژئاوای کوردستان لە بەردەم پارکی شانەدەر دەستپێدەکات".

 

لەبارەی ئەو پێداویستییانەی وەریدەگرن پارێزگاری هەولێر گوتی: "ئەوانەی زۆر گرنگن پاکێجی خۆراک، جلوبەرگ و شیری منداڵ، دایبی، بەتانی و دۆشەکە و هەر پێداویستییەکانی دیکەی رۆژانە".

 

ئومێد خۆشناو داوای لە هاونیشتمانیان کرد، "ئەو پێداویستییانە ببەن کە هاونیشتمانیان بتوانن راستەوخۆ سوودی لێ وەربگرن".

 

لەبارەی بەخشینی پارەوە پارێزگاری هەولێر گوتی: "سندووقی کۆکردنەوەی پارە لە کەمپەینەکە دادەنرێت و لە داهاتووشدا هەژمارێکی بانکی رادەگەیێنین".

 

ئومێد خۆشناو ئاماژەی بەوەشکرد، هەموو هاونیشتمانییان بە گوێرەی توانایان چی دەتوانن پێشکێشی کوردانی رۆژئاوای کوردستانی بکەن دەتوانن لەگەڵ خۆیاندا بیگەیێننە کەمپینەکە.

 

ماوەی چەند رۆژێکە لە بەشێکی شارەکانی هەرێمی کوردستان کەمپینی جیاواز بۆ کۆکردنەوەی هاوکاری بۆ پشتیوانی هاونیشتمانیانی رۆژئاوای کوردستان دەستیپێکردووە، لەنێویاندا دوێنێ 21ـی مانگ لە دهۆک کەمپینێکی کۆکردنەوەی هاوکاری راگەیێندرا.

 

هەر دوێنێ دەزگای خێرخوازیی بارزانی لە هەرێمی کوردستانەوە 67 بارهەڵگر پێداویستی و هاوکاری گەیاندە رۆژئاوای کوردستان.

 

بەهۆی هێرشەکانی سووپای عەرەبیی سووریاوە بۆ گەڕەکە کوردنشینەکانی حەلەب لە 06ـی ئەم مانگە و دواتر فراوان بوونی هێرشەکان بۆ تەواوی ناوچەکانی ژێر دەسەڵاتی بەڕێوەبەرایەتی خۆسەر، هەزاران هاونیشتمانی ئاوارەی ناوچە ئارامەکانی رۆژئاوای کوردستان بوون و پێویستیان بە هاوکاری خێرا هەیە.