داواکاری گشتیی سلێمانی: هەر هاونیشتمانییەک پابەندی رێنماییە تەندروستییەکان نەبێت، دەدرێتە دادگا

 

 

 

داواکاری گشتیی سلێمانی لە راگەیێندراوەکەدا داوا لە هاونیشتمانییان دەکات، "لەبەر سەلامەتیی گیانی خۆتان و خانەوادەکانتان پابەندی رێنماییەکان بن و لە ماڵەکانتان بمێننەوە".

 

لە راگەیێنداروەکەدا ئاماژە بەوە کراوە، "هەر هاونیشتمانییەک پابەند نەبێت و تووشی ئەو ڤایرۆسە ببێت، بە ئەنقەست یان بە هەڵە ببێتە هۆی بڵاوبوونەوەی لەنێو هاونیشتمانییاندا، رێکاری یاسایی دژی دەگیردرێتەبەر و دەدرێتە دادگا".

 

هەروەها پێشتر د. سەباح هەورامی، بەڕێوەبەری تەندروستیی سلێمانی رایگەیاند، "ڤایرۆسی کۆرۆنا لە گەڕەکەکانی شاردایە و هەر ئەوە ماوە بگاتە نێو ماڵەکان و تکایە لە ماڵەکانتاندا بمێننەوە".

 

دوێنێ شەو لەشکر حامید، سەرۆکی لیژنە هاوبەشەکانی قایمقامیەتی سلێمانی باسی لەوە کرد، دۆخەکە لە سلێمانی مەترسیدارە و ژمارەی تووشبووان بە ڤایرۆسی کۆرۆنا لە زیادبووندایە.

 

تاوەکو ئێستا لە هەرێمی کوردستان 54 هاونیشتمانی تووشی ڤایرۆسی کۆرۆنا بوون، 13 تووشبوو چاک بوونەتەوە و تووشبوویەکیش بەو هۆیەوە گیانی لەدەستداوە.