دەیڤید شەنکەر، یاریدەدەری پێشووی وەزیری دەرەوەی ئەمریکا بۆ کاروباری رۆژهەڵاتی نزیک پێیوایە، رووبەڕووبوونەوەی راستەوخۆی نێوان ئەمریکا و ئێران دوای هێرشەکەی سەر قەتەر "کۆتایی هاتووە"، بەڵام هۆشداری دەدات مەترسیی ئەوە هەیە ئێران گرووپەکانی سەر بەخۆی، وەک حەشدی شەعبی، بۆ هێرشکردنە سەر بەرژەوەندییەکانی ئەمریکا بەکاربهێنێت.
جێگری پارێزگاری گیلانی ئێران رایگەیاند، لە هێرشێکدا لە شاری ئاستانەی ئەشرەفییەی ئەو پارێزگایە، 9 کەس کوژراون و 33ی دیکە بریندار بوون، کە 16 کەسیان ژن و منداڵن. ئەمەش لە کاتێکدایە کە دوێنێ لە هەمان پارێزگا، 36 کەس بە تۆمەتی "هاوکاریکردنی ئیسرائیل" دەستگیر کرابوون
گوتەبێژی دەستەی قەیرانەکانی پارێزگای قوم رایگەیاند، ئیسرائیل جارێکی دیکە هێرشی کردووەتەوە سەر بنکەی ئەتۆمیی فۆردۆ. ئەمە دووەم هێرشە بۆ سەر هەمان بنکە لە ماوەی 24 کاژێردا، دوای ئەوەی دوێنێ ئەمریکا هەمان شوێنی کردە ئامانج. هاوکات ئیسرائیل لە تاران زانکۆیە، زیندانێک و کەناڵێکی تەلەڤیزیۆنییشی کردە ئامانج
سەرۆکی پەرلەمانی ئێران هۆشدارییەکی تووندی ئاراستەی ئەمریکا کرد و رایگەیاند، "وەڵامێک دەدەینەوە کە ترەمپی قومارچی لە دەستدرێژییەکەی پەشیمان بکاتەوە." هاوکات رایگەیاند، پەرلەمان خەریکی ئامادەکردنی پرۆژەیاسایەکە بۆ راگرتنی هاوکارییەکان لەگەڵ ئاژانسی نێودەوڵەتیی وزەی ئەتۆم
سەرۆکی رووسیا، لە کۆشکی کرێملین پێشوازی لە وەزیری دەرەوەی ئێران کرد و هێرشەکانی سەر ئەو وڵاتەی بە "دەستدرێژییەکی بێپاساو" ناوبرد و بەڵێنی دا "هەوڵی خۆیان بۆ یارمەتیدانی گەلی ئێران" بەکاربهێنن. لە بەرامبەردا وەزیری دەرەوەی ئێران سوپاسی هەڵوێستی رووسیای کرد.
وەزیری خوێندنی باڵای ئێران رایگەیاند، سەرجەم تاقیکردنەوەکانی کۆتایی وەرزی زانکۆکان بۆ مانگی ئەیلوول دواخران
سوپاسالاری گشتیی هێزە چەکدارەکانی ئێران رایدەگەیێنێت، ئەمریکا بە هێرشەکەی، دەستی هێزەکانی ئێرانی بۆ "هەر جۆرە کردەوەیەک" دژی بەرژەوەندی و سوپاکەی واڵا کرد. هاوکات، بنکەی ناوەندیی خاتەم ئەلئەنبیاش هۆشداری دەداتە ئەمریکا، کە چاوەڕێی "ئۆپەراسیۆنی بەهێز و ئەنجامی قورس" بن
سوپای پاسدارانی ئێران یەکەم گرتەی ڤیدیۆیی سەردار محەممەد پاکپوور، فەرماندەی گشتیی نوێی سوپاکەی لەنێو ژووری ئۆپەراسیۆنی جەنگەوە بڵاوکردەوە و رایگەیاند، ئۆپەراسیۆنە ئاسمانییەکان راناگیرێن
گوتەبێژی حکومەتی ئێران رایگەیاند، هیچ مەترسییەک لەسەر دانیشتووانی دەوروبەری بنکە ئەتۆمییەکان نییە و دڵنیایی دا، دەتوانن بە ئاسوودەیی لە ژیانی خۆیان بەردەوام بن. هاوکات چەندین بڕیاری نوێی حکومەتی راگەیاند، لەوانەش زیادکردنی گەشتە ئەمنییەکانی شەوانە، نوێکردنەوەی ئۆتۆماتیکیی مۆڵەتی کارەکان و هەڵگرتنی قەدەخەی سەر هاوردەکردنی برنج
وەزیری دەرەوەی ئێران رایگەیاند، ئەمریکا بە هێرشکردنە سەر دامەزراوە ئەتۆمییەکانیان "هەموو هێڵە سوورەکانی بەزاندووە" و "ناپاکیی لە دیپلۆماسی کردووە،" بۆیە ئێستا کاتی گفتوگۆ نییە. عێراقچی ئاشکراشی کرد، ئەمڕۆ سەردانی مۆسکۆ دەکات و لەگەڵ ڤلادیمیر پووتین، سەرۆکی رووسیا کۆدەبێتەوە
سەرۆکی کۆمەڵەی پیشەیی گازی سرووشتی (CNG) لە ئێران رایگەیاند، بۆ کەمکردنەوەی قەرەباڵخیی سەر بەنزینخانەکان و هاندانی خاوەن ئۆتۆمبێلەکان، هەڵمەتێکیان دەستپێکردووە کە تێیدا لە نزیکەی 500 وێستگەدا گازی سرووشتی بە خۆڕایی دابەش دەکرێت
وەزیری ئابووریی ئێران رایگەیاند، قەبارەی هاوردەکردنی کاڵا سەرەکییەکان بۆ وڵاتەکەی لە ماوەی هەفتەیەکدا 53% زیادیکردووە. هاوکات فەرمانی کردووە گومرگەکانی وڵاتەکەی بۆ دابینکردنی پێداویستییەکان، 24 کاژێر کار بکەن
سەرۆککۆماری ئێران بە تووندی سەرکۆنەی هێرشەکەی ئەمریکای بۆ سەر دامەزراوە ئەتۆمییەکانی وڵاتەکەی کرد و رایگەیاند، ئەمریکا دوای ئەوەی "بێتوانایی ئاشکرای رژێمی زایۆنی"ـی بینی، ناچار بوو خۆی بێتە گۆڕەپانەکە. دەشڵێت، کاتی ئەوە هاتووە ناکۆکییەکان وەلا بنرێن و توانای گەل بۆ رووبەڕووبوونەوەی دۆخەکە بەکاربهێنرێت.
سەرۆکی رێکخراوی وزەی ئەتۆمیی ئێران لە نامەیەکدا بۆ بەڕێوەبەری گشتیی ئاژانسی نێودەوڵەتیی وزەی ئەتۆم، داوای لێپێچینەوە لە ئەمریکا دەکات و تۆمەتباری دەکات بە "بێکرداری و هاودەستی". لە وەڵامدا، رافایێل گرۆسی رایگەیاند، هەوڵ بۆ ئەنجامدانی کۆبوونەوەیەکی بەپەلەی ئەنجوومەنی حاکمان دەدات.
وەزارەتی دەرەوەی ئێران لە راگەیێندراوێکدا بە تووندی سەرکۆنەی هێرشی ئەمریکای بۆ سەر دامەزراوە ئەتۆمییەکانی دەکات و دەڵێت، ئەو هێرشە "پێشێلکارییەکی زەق و بێوێنەی بنەما سەرەکییەکانی پەیماننامەی نەتەوە یەکگرتووەکان و یاسا نێودەوڵەتییەکانە". حکومەتی ئەمریکاش بە "شەڕخواز و یاساشکێن" و هۆکار و بەرپرسیاری دەرەنجامە گەورە و مەترسیدارەکانی ئەو "تاوانە" دادەنێت.
گوتەبێژی حکومەتی ئێران دەڵێت، دابینکردنی خۆراک و کاڵا سەرەکییەکان لە نێوخۆی وڵات ئاساییە. ئاماژە بەوەش دەکات، پاکێجێکی هاوکاریی دارایی بۆ پشتیوانی لە کەرتی پیشەسازی ئامادە کراوە
بەرپرسێکی کۆمپانیای پاڵاوتنی نەوتی تاران رایگەیاند، پاڵاوگەکەیان بە تەواوی سەلامەتە و هیچ کێشەیەکی نییە، روونیشی دەکاتەوە ئەو دووکەڵەی لە نزیک پاڵاوگەکەوە بینراوە، پەیوەندیی بە ئەوانەوە نییە.
عەباس عێراقچی، وەزیری دەرەوەی ئێران، لەگەڵ گەیشتنی بە ئیستەنبووڵ بۆ بەشداریکردن لە کۆبوونەوەی وەزیرانی دەرەوەی رێکخراوی هاریکاریی ئیسلامی، رایگەیاند: "ئەم کۆبوونەوەیە پێشتر پلانی بۆ دانرابوو، بەڵام بە لەبەرچاوگرتنی دەستدرێژیی رژێمی زایۆنی بۆ سەر وڵاتەکەمان، داوامان کرد کۆبوونەوەیەکی تایبەت لەمبارەیەوە بکرێت کە خۆشبەختانە پەسند کرا."
جێگری پارێزگاری ئەسفەهان بۆ کاروباری ئەمنی رایگەیاند، بەرەبەیانی ئەمڕۆ (شەممە، 21-06-2025) ئیسرائیل هێرشی کردووەتە سەر هەندێک ناوچە لە سنووری شارۆچکەکانی لنجان، موبارەکە، شەهرەزا و خودی شاری ئەسفەهان.
بە فەرمانێکی رێبەری کۆماری ئیسلامیی ئێران، محەممەد کەرەمی کرایە فەرماندەی نوێی هێزی وشکانیی سوپای پاسداران و دەستخۆشی لە فەرماندەی پێشوو کرا.
سەرۆککۆماری ئێران لە تۆڕی کۆمەڵایەتیی ئێکس پەیامێکی بڵاوکردەوە و دەڵێت، هەموو دامەزراوە حکومییەکان راسپێردراون لە خزمەتگوزارییەکان درێخی نەکەن. ئاماژە بەوەش دەکات "ئەم رۆژە دژوارانە" تێدەپەڕێنن.
وەزیری بەرگریی ئیسرائیل دەڵێت، عەلی خامنەیی، رێبەری کۆماری ئیسلامیی ئێران "بە بەرپرسیار دادەنرێ" لە بەرامبەر هێرشی سەر نەخۆشخانەکەی ئەمڕۆ. ئاماژە بەوەش دەکات، فەرمانی بە سوپا کردووە "هێرشەکان" چڕ بکاتەوە.
سوپای پاسداران لەبارەی هێرشەکەی ئەم بەیانییەی بۆسەر ئیسرائیل دەڵێت، ناوەندێکی هەواڵگری و فەرماندەیی سوپای ئیسرائیلی کردووەتە ئامانج.
بۆ دەنگدانی پەرلەمانی کوردستان کۆمیسیۆنی سەربەخۆی هەڵبژاردنەکانی عێراق کۆمەڵێک مەرجی داناوە کە بەبێ ئەو مەرجانە دەنگدەر ناتوانێت دەنگ بدات و تووشی گرفت دەبێت
