ئاڵا تاڵەبانی لە بوون بە بەربژێری یەکێتی بۆ پەرلەمانتاری عێراق دوورخرایەوە

 

نووسراوێک بە ناوی "لیژنەی باڵای هەڵبژاردنەکانی یەکێتیی نیشتمانیی کودستان- زۆنی کەرکووک، سەڵاحەدین" بڵاوکراوەتەوە و تێیدا ناوی شەش بەربژێری حیزبەکە لە سنوورەکەدا نووسراوە، بێ ئەوەی ناوی ئاڵا تاڵەبانی تێدابێت.

 

نووسراوەکە بەرواری رۆژی یەکشەممە 22-8-2021ی بە ژمارە 26 لەسەرە و تێیدا نووسراوە، "ئاگاداری هەموو ئەندامان و کادرانی یەکێتی لە سنووری چالاکی میحوەر بکەنەوە کە تەنها ئەم هەڤاڵانە کاندیدی یەکێتین لە سنووری پارێزگای کەرکووک".

 

 

سدیق عومەر رەسووڵ

سەباح حەبیب قادر

موئەید غازی

دیلان غەفوور

ئاشتی مەهدی

گەیلان قادر

 

هەروەها نووسراوە، "بەپێچەوانەوە لێپرسینەوە لەو هەڤاڵانە دەکرێت کە بانگەشەی هەڵبژاردن و کەمپەین بۆ هەر کاندیدێکی دیکە لە دەرەوەی یەکێتیی نیشتمانی کوردستان" دەکەن. 

 

ئاڵا تاڵەبانی لەو بارەوە بە تۆڕی میدیایی رووداوی گوت: "ئاگام لەوە نییە دوورخرابێتمەوە". ئاڵا تاڵەبانی ئاماژەی بەوەشکرد، هەرکاتێک بە فەرمی لە دوورخستنەوەی ئاگادارکرایەوە قسەی خۆی دەبێت.

 

دوورخستنەوەی ئاڵا تاڵەبانی دوای ئاڵۆزییەکانی نێوان هاوسەرۆکانی حیزبەکە دێت کە لە 08-07-2021ـەوە سەریهەڵدا و بەردەوامی هەیە.

 

بڕیارە 10-10-2021، هەڵبژاردنی ئەنجوومەنی نوێنەرانی عێراق لە عێراق و هەرێمی کوردستان بەڕێوەبچێت.