بەڕێوەبەری گشتیی پەروەردەی سلێمانی بۆ رووداو: تاقیکردنەوەی خولی دووەم دواناخرێت

 

 

ئەمڕۆ هەینی 22ی ئابی 2025 نەژاد عەبدوڵڵا، بەڕێوەبەری گشتیی پەروەردەی سلێمانی بە تۆڕی میدیایی رووداوی گوت، "هیچ بڕیارێکی لەو شێوەیە نەدراوە و تاقیکردنەوەکانی خولی دووەمی پۆلی 12 دواناخرێن."

 

رۆژی 21ی تەممووزی 2025، وەزارەتی پەروەردە لە نووسراوێکدا خشتەی تاقیکردنەوەکانی خولی دووەمی پۆلی 12ی ئامادەیی بڵاوکردەوە و رایگەیاند، رۆژی 23ـی ئابی 2025 یەکەم تاقیکردنەوەی خولی دووەم کاژێر 07:30ی بەیانی بەڕێوەدەچێت.

 

هەر ئەمڕۆ پەیوەند خالید، قوتابی پۆلی 12 وێژەیی لە سلێمانی بە رووداوی گوت، "بە نوێنەرایەتی کۆمەڵێک قوتابی کە ماڵمان لە نزیک هۆتێل لالەزارە، داوا لە وەزیری پەروەردە و لایەنی پەیوەندیدار دەکەین تاقیکردنەوەکانی خولی دووەممان بۆ دوابخەن."

 

بە گوتەی ئەو قوتابییە، بەهۆی شەڕەکەوە ماڵەکانیان چۆڵ کردووە و ناتوانن وانەکانیان بخوێنن.

 

یەکەم تاقیکردنەوە بۆ بەشی زانستی بە وانەی زیندەزانی و بۆ بەشی وێژەیی بە مێژوو دەستپێدەکات. تاقیکردنەوەکان تاوەکو 8ـی ئەیلوولی 2025 بەردەوام دەبن و هەفتانە سێ تاقیکردنەوە دەکرێن.

 

بەڕێوەبەری گشتیی پەروەردەی سلێمانی گوتی، "بڕیاری دواخستن لە دەسەڵاتی ئێمە نییە و پێویستە وەزارەت ئەو بڕیارە بدات، چونکە پەیوەندی بە هەموو هەرێمی کوردستانەوە هەیە. هاوکات زیاتر لە مانگێکە خشتەی تاقیکردنەوەکان بڵاوکراوەتەوە و پێویستە تاوەکو ئێستا قوتابی خۆی ئامادە کردبێت."

 

رۆژی 1ـی حوزەیرانی 2025، تاقیکردنەوەی خولی یەکەمی پۆلی 12ـی ئامادەیی لە 2,017 هۆڵ لە سەرتاسەری هەرێمی کوردستان دەستی پێکرد.