بەڕێوەبەرایەتی دژە تیرۆر- سلێمانی : دەستگیرکردنی لە یاسا دەرچووان تەنیا قۆناخی یەکەمی سزادانیانە

 

بەڕێوەبەرایەتیی گشتیی دژەتیرۆری سلێمانی ئەمڕۆ هەینی 22-8-2025 لە راگەیێندراوێکدا بڵاویکردەوە: "بەداخ و پەژارەیەکی زۆرەوە هەواڵی شەهیدبوونی هاوڕێ و هەڤاڵمان (ئاری شێخ سوعاد تاڵەبانی) رادەگەیێنین، کە شەوی رابردوو لەکاتی جێبەجێکردنی بڕیاری دادوەر بۆ دەستگیرکردنی ژمارەیەک لە یاسادەرچوو، گیانی سپارد و گەیشتە پلەی شەهادەت."

 

دژەتیرۆر لە بەشێکی دیکەی راگەیێندراوەکەدا ئاری شێخ سوعاد بە "یەکێک لە پێشمەرگە نەبەرد، قارەمان و دلێرەکانی دژەتیرۆر" ناودەبات و دەڵێت، "بە کارامەیی و تواناکەی توانیبووی خۆی بسەلمێنێت."

 

لە کۆتایی راگەیێندراوەکەدا، دژەتیرۆر جەخت دەکاتەوە کە خوێنی شەهیدەکەیان بەفیڕۆ ناڕوات و هۆشداری دەداتە "یاسادەرچووان" و دەڵێت: "دڵنیایی دەدەین خوێنی شەهید ئاری بەفیڕۆ ناڕوات و لە یاسادەرچووان تووندترین سزا دەدرێن و دەستگیرکردنیان تەنیا قۆناخی یەکەمی سزادانیان بووە."

 

لە پاش کاژێر 03:00ـی بەرەبەیانیی ئەمڕۆ هەینی، شەڕ لە لالەزار دەستیپێکرد، دواتر چەند درۆنێکیش لە دەباشان کەوتنە خوارەوە.

 

دوای نزیکەی چوار کاژێر لە شەڕ و پێکدادان، شەڕەکە بە دەستگیرکردنی لاهوور شێخ جەنگی و دوو لە براکانی و ئەندامانی هێزی دووپشک کۆتایی هات.

 

هێزە ئەمنییەکان داوای خۆبەدەستەوەدانیان لە لاهوور شێخ جەنگی کرد و گوتیان کە فەرمانی دەستگیرکردنیان پێیە، ئەویش رەتیکردەوە.