لە کەرکووک بەراز پەلاماری دوو کەسی دا
رووداو دیجیتاڵ
لە دوو شوێنی جیاوازی کەرکووک، بەراز پەلاماری جووتیارێک و شوانێکیان دا و بە سەختی برینداریان کردوون، لە نەخۆشخانە چارەسەر وەردەگرن.
سامان یابە عەلی، گوتەبێژی تەندروستیی کەرکووک بە تۆڕی میدیایی رووداوی راگەیاند: "هەردوو رووداوەکە ئەمڕۆ بووە، پێشتر لە کەرکووک رووداوی هاوشێوە نەبووە، بەراز جووتیار و شوانێکی لە دوو ناوچەی جیاواز بە سەختی بریندار کردووە.''
گوتەبێژی تەندروستیی کەرکووک دەڵێت: "هەردوو بریندارەکە گوازرانەوە نەخۆشخانە و دوای وەرگرتنی چارەسەر، تەندروستییان جێگیرە".
یەکێک لەوانەی بەراز پەلاماری داوە شوانە، تەمەنی 15 ساڵە و لە داقووق بەراز هێرشی کردووەتە سەری، هەروەها لە دەوروبەری کەرکووکیش جووتیارێکی تەمەن 39 ساڵان لەکاتی کشتوکاڵدا رووبەڕووی پەلاماری بەراز بووەتەوە.
لە سنووری کەرکووک لە شارۆچکەی دووبز دارستانێک هەیە، دەیان ساڵە بوونی بەراز و گیانەوەری دیکەی کێوی تێدا بینراوە، چوونی بەراز بۆ نزیک ئاوەدانی و گوند و شارەکان چەندین هۆکاری هەیە، سەرەکیترینیان دەستنەکەوتنی خۆراک و ئاوە لە چیا و شوێنی ژیانیان.
بەراز ئاژەڵێکە پێویستی بە بڕێکی زۆر وزە هەیە، کاتێک لە دارستان و چیاکان خۆراکی سرووشتی (وەک بەڕوو، رەگ و ریشەی رووەکەکان) کەم دەبێتەوە، ناچار دەبێت بۆ پەیداکردنی خۆراک بێتە خوارەوە بۆ ناو کێڵگە کشتوکاڵییەکان و باخەکان.
هەروەها فراوانکردنی ناوچەی نیشتەجێبوونی مرۆڤ و نزیکبوونەوە لە شوێنی ژیانی ئەو ئاژەڵە، یەکێک لە سەرەکیترین هۆکارەکان. جگە لەوەش، فڕێدانی پاشماوەی خۆراک و زبڵ لە دەوروبەری شار و گوندەکان، هۆکارێکی دیکەیە. بۆنی پاشماوەی خۆراک بەراز رادەکێشێت و وای لێدەکات فێر بێت کە لە نزیک مرۆڤەکان "خۆراکی ئاسان" دەست دەکەوێت.
گۆڕانی کەشوهەوا هۆکارێکە
بەهۆی گەرمبوونی زەوی و کەمبارانی، زۆربەی سەرچاوە ئاوییەکانی ناو شاخەکان (کانیاوەکان) وشک دەبن، بەراز بەرگەی تینوێتی ناگرێت و بۆ دۆزینەوەی ئاو دێتە خوارەوە بۆ ناو گوندەکان و نزیک رووبارەکان کە ئاوەدانییان لێیە.
هەروەها گۆڕانی کەشوهەوا وایکردووە سووڕی ژیانی رووەکەکان تێکبچێت، ئەمەش دەبێتە هۆی کەمبوونەوەی ئەو بەرووبوومە کێوییانەی بەراز دەیخوات، بۆیە پەنا دەباتە بەر بەرووبوومی جووتیاران (وەک پەتاتە، گەنم، خەیار و تەماتە).
جگە لەوەش بەراز بۆ خۆفێنکردنەوە پێویستی بە قوڕ و ئاوە، زۆرجار لەو ناوچانەی تێیدا دەژین ئەوە دەست ناکەوێت، بۆیە روو لەو ناوچانە دەکات مرۆڤ ئاودێری تێدا دەکات.
تێکدانی ژینگە لەلایەن مرۆڤ و گۆڕانی کەشوهەوا دوو هۆکاری سەرەکین، هاوسەنگیی ژیانی ئەم ئاژەڵەیان تێکداوە و ناچاریان کردووە بێنە نێو ئاوەدانی.