هەندرێن وەرتی: بەرزبوونەوەی نرخی زێڕ، دابونەریتی هاوسەرگیری لە کوردستان گۆڕیوە

 

هەندرێن وەرتی، سەرۆکی سەندیکای زێڕنگرانی هەولێر، لە بووڵتەنی کاژێر 12:00ـی تۆڕی میدیایی رووداو، شرۆڤەیەکی وردی بۆ دۆخی زێڕ و کاریگەرییە جیهانی و نێوخۆییەکان کرد.

 

 

سەرۆکی سەندیکای زێڕنگران دەڵێت، سیاسەتەکانی دۆناڵد ترەمپ، کاریگەری راستەوخۆی لەسەر بازاڕ دەبێت، "ئەگەر ترەمپ بڕیاری گۆڕینی جێرۆم پاوڵ، سەرۆکی یەدەگی فیدراڵی بدات و داوای کەمکردنەوەی رێژەی سووی بانکی بکات، ئەوا کارەسات لە نرخی زێڕ روودەدات و نرخەکەی زۆر زیاتر بەرز دەبێتەوە."

 

بە بڕوای وەرتی، "ترەمپ سیاسەتی قازانجی شەخسی و کۆمپانیاکان تێکەڵ بە سیاسەتی نیشتمانی دەکات و هەموو هەوڵێک دەدات بۆ بەهێزکردنی ئابووری ئەمریكا، کە ئەمەش رەنگە لە قازانجی بەرزبوونەوەی زێڕدا بشکێتەوە، هەرچەندە ئەگەر هەیە بەهۆی رێککەوتنە سیاسییەکان بۆ ماوەیەک نرخ دابەزێنێت."

 

 

سەبارەت بە بازاڕی نێوخۆی هەرێمی کوردستان، وەرتی دڵنیایی دا کە کوالێتی زێڕی هەولێر لە ئاستێکی بەرزدایە و  دەڵێت: "لە هەولێر کارگەی لیرەی زێڕمان هەیە کە کوالێتییان لە لیرەی تورکیا و دوبەی باشترە."

 

ئاماژەی بەوەشکرد، ئێستا بەهۆی گرانی نرخەکەوە، هاونیشتمانییان توانای کڕینی بڕی زۆری زێڕیان نەماوە، بۆیە پەنایان بۆ کڕینی "چارەکە لیرە" بردووە وەک رێگەیەک بۆ پاشەکەوتکردن، تاوەکو پارەکەیان نەفەوتێت.

 

 

بەرزبوونەوەی خەیاڵی نرخی زێڕ، دابونەریتی هاوسەرگیریشی لە کوردستان گۆڕیوە. بە گوتەی سەرۆکی سەندیکای زێڕنگران: "جاران بە تێکڕا بۆ هاوسەرگیری 25 مسقاڵ زێڕ دەکڕدرا، بەڵام ئێستا دابەزیوە بۆ 3 بۆ 4 مسقاڵ. خەڵک هەیە بە 3 مسقاڵ (گوارە و ئەڵقە و زنجیرێکی باریک) پرۆسەی هاوسەرگیری ئەنجام دەدات و بە دڵخۆشیش دەڕۆنەوە."

 

روونیشیکردەوە کە مووچە کاریگەری راستەوخۆی لەسەر جوڵەی بازاڕ هەیە، بەڵام لە ئێستادا بەهۆی کۆتایی ساڵ و خەرجییەکانی سەری ساڵەوە، بازاڕی زێڕ لە هەولێر و شارەکانی دیکە کەمێک سستی تێکەوتووە.

 

هەندرێن وەرتی جەختی کردەوە کە سەرەڕای دۆخەکە، "هەولێر وەک پایتەخت، کراوەترین و گەرمترین بازاڕی کڕین و فرۆشتنی زێڕە لەسەر ئاستی هەرێمی کوردستان."