بەفر گەشتە ئاسمانییەکانی ئامەد و شرنەخی راگرت

 

لە ئێوارەی دوێنێوە بەفربارین لە ئامەد دەستیپێکردووە، ئەمەش بووەتە هۆی دروستبوونی ئاستەنگ بۆ هاتووچۆی ئۆتۆمبێل و هەڵوەشاندنەوەی بەشێک لە گەشتە ئاسمانییەکانی فڕۆکەخانەی شارەکە.

 

هاوکات لە شرنەخ کاریگەریی شەپۆلەکە زیاترە؛ بەڕێوەبەرایەتیی فڕۆکەخانەی شەرەفەدین ئەلچی رایگەیاندووە، بەهۆی دۆخی کەشوهەواوە گەشتەکانی نێوان (ئەنقەرە - شرنەخ) و (ئیستەنبووڵ - شرنەخ) بە هەردوو ئاراستەدا هەڵوەشێندراونەتەوە.

 

جگە لە وەستانی گەشتەکان، لە شرنەخ رێگەی 35 گوند بە رووی هاتووچۆدا داخراون، کە دابەشبوون بەسەر؛ 21 گوند لە قەزای ئێلکێ، 9 گوند لە قڵابان و 5 گوندیش لە ناوەندی شرنەخ.

 

بە گوێرەی زانیارییەکان، لە ناوچە شاخاوییەکانی شرنەخ  زیاتر لە مەترێک بەفر باریوە و لە قەزای ئێلکێ گەیشتووەتە 2 مەتر.

 

بەڕێوەبەرایەتیی گشتیی کەشناسیی تورکیا پێشبینی دەکات شەپۆلەکە بەردەوام بێت و لە پارێزگاکانی ئامەد، ئێلیه، سێرت و شرنەخ بەفربارینەکە چڕتر بێتەوە.