دوو کەس لەکاتی رزگارکردنی منداڵێک لە بەنداوی سنەدا خنکان

 

 

ئازاد تەهماسبی، سەرۆکی رێکخراوی بەرگری شارستانیی سنە ئەمڕۆ هەینی رایگەیاند، دوو پیاو دوانیوەڕۆی رۆژی پێنجشەممە لە بەنداوی سنە خنکاون و شەوی رابردوو تەرمی یەکێکیان دۆزراوەتەوە و هەوڵی دۆزینەوەی تەرمی ئەوی دیکەش دەدرێت.

 

لەبارەی هۆکاری خنکانیان تەهماسبی دەڵێت، چەند خێزانێکی خەڵکی کرماشان بۆ گەشتوگوزار چوونەتە قەراخ بەنداوەکە و منداڵی یەکێک لە خێزانەکان، کە لەسەر بەلەمێکی چووپ بووە، کەوتووەتە نێو ئاو و ئەو دوو پیاوەش بۆ رزگارکردنی منداڵەکە چوونەتە نێو بەنداو.

 

منداڵەکە رزگار کراوە و ئەو دوو کەسەش کە تەمەنیان 30 و 35 ساڵانە، خنکاون.