نوێنەرێکی گرێبەستەکانی خوێندنی باڵا: مووچەمان بۆ خەرج کرا

 

محەممەد نەجیب، یەکێک لە نوێنەرانی مامۆستایانی وانەبێژی پێشوو و گرێبەستی ئێستا، ئەمڕۆ یەکشەممە بە تۆڕی میدیایی رووداوی گوت: "16ـی ئەم مانگەوە لە رێگەی رووداوەوە داوای خەرجکردنی پارەی وانەبێژیی پارمان کرد، خۆشبەختانە دەنگمان گەیشتە حکومەت و بەشێکی پارەکەمان بۆ خەرج کرا".

 

ئەو نوێنەرەی مامۆستایانی خوێندنی باڵا گوتی: "دوو رۆژە خەرجکردنی پارە دەستیپێکردووە و نزیکەی 75%ـی زانکۆکان پارەیان بۆ خەرجکراوە، زانکۆ هەیە کرێی مانگێک، هەیە و دوو و یان سێ مانگی وانەبێژەکانی پاری داوە".

 

بە گوتەی محەممەد نەجیب، "پار تاوەکو لە 28-10-2024 کراینە گرێبەست، تەنیا سێ جار کرێی وانەبێژیی ئەو ساڵەمان وەرگرت؛ مانگەکانی چوار، پێنج و شەش هەروەها مانگەکانی 8، 9 و 10ـی لە ساڵی 2024 کرێی وانەبێژییان وەرنەگرتووە".

 

د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵای هەرێمی کوردستان، یەکشەممەی رابردوو لە وەڵامی داواکاری ئەو مامۆستایانەدا بە تۆڕی میدیایی رووداوی گوتبوو: "نەدانی کرێی وانەبێژەکانی ئەو مانگانەی ساڵی رابردوو گشتیی بووە نەوەکو پارێزگایەک و دووان و ژمارەیان زیاترە لە 3 هەزار کەس، ئێمە رێکارەکانمان بۆ کردوون، زانکۆکان پارەیان کردووە بە چەک و چوونەتە بانک گوتراوە پارە نییە".