رۆژانە لە نەخۆشخانەی شار لە سلێمانی 25 تووشبووی پەتای وەرزی تۆمار دەکرێن

 

بەڕێوەبەرى نەخۆشخانەی شار دەڵێت، ئەنجامى نموونەى پشکنینەکان دەریانخستووە کە هەردوو پەتاى جیهانیی ئەنفلەوەنزا و کۆرۆناش تۆمارکراون، بەڵام وەک پەتایەکى ئاسایی وەرزین و دواى یەک تاوەکو دوو هەفتە، زۆرینەی تووشبووەکان دۆخی تەندروستییان ئاسایی دەبێتەوە.

 

ئومێد عەلى، بەڕێوەبەرى نەخۆشخانەى شار دەڵێت، "بۆ ئەو کەسانەى کە ئاسایین، ئەم پەتایە تەنیا پەتایەکى وەرزییە و زیاتر هیچ نییە، جێگەى ترس و دڵەڕاوکێ نییە، تەنیا پێویستیان بە خۆپاراستنە. ئەوانەى هەست دەکەن هەناسەیان تووندە و کۆکە و پژمەیان هەیە، رێنماییەکان جێبەجێ بکەن کە زۆر سادەیە تەنیا مانەوە لە ماڵ و خۆیان گەرم داپۆشن و خواردن و خواردنەوەى گەرم و شل بخۆن."

 

بەشێک لە هاونیشتمانییان لەبارەی پەتاکەوە لە بازاڕی سلێمانی قسەیان بۆ رووداو کرد، زۆرینەیان دەڵێن، خۆیان یان ماڵەوەیان تووشى پەتاکە بوون.

 

عەبدوڵڵا هەمزە، پێشمەرگەى دێرین بە رووداوی گوت، "وەرزى پاییز هەروایە و پەتا دەهێنێت، نابێت خەڵک هەروەک هاوین ئاوى سارد بخواتەوە و جل لەبەر بکات، دەبێت خۆت دکتۆرى خۆت بیت."

 

رەئوف ئەحمەد، هاونیشتمانی دەڵێت، "من خۆم و ماڵەوەش گرتمانن، تەنیا یەک دوو پارچە دەرمانمان وەرگرت و زوو باشبووین."

 

محەممەد قادر ئاماژە بەوە دەکات، "من ئەو پەتایەم گرت، هەمووى دوو رۆژ پێمەوە بوون، تەنیا شەوان زەیتى زەیتونم خوارد و نەشچوومە لاى دکتۆر."

 

بەپێى زانیارییەکانى رووداو، لە کۆى تووشبووانى پەتاى ئەنفلوەنزا لە سلێمانى، یەک کەس لە نەخۆشخانەى شار بەو پەتایە گیانى لەدەستداوە کە کەسێکى بەتەمەن بووە و پێشتر نەخۆشیى درێژخایەنى هەبووە.